O Sergas inicia unha nova etapa coa renovación de catro xerentes para afrontar os novos retos da sanidade pública

O Servizo Galego de Saúde está a iniciar unha nova etapa nesta lexislatura, para o que está a acometer un proceso de renovación nalgunhas das súas Estruturas Organizativas de Xestión Integrada (EOXIs) coa fin de adaptalas aos novos retos que a Sanidade ten por diante nos próximos anos
Publicado por o día 23/02/2017 na sección de Sanidad,Vigo,Xunta de Galicia

O Sergas inicia unha nova etapa coa renovación de catro xerentes para afrontar os novos retos da sanidade pública

O Servizo Galego de Saúde está a iniciar unha nova etapa nesta lexislatura, para o que está a acometer un proceso de renovación nalgunhas das súas Estruturas Organizativas de Xestión Integrada (EOXIs) coa fin de adaptalas aos  novos retos que a Sanidade ten por diante nos próximos anos.

O obxectivo é impulsar a innovación na xestión e a capacidade de adaptación do sistema público ás novas necesidades da sociedade, para afrontar retos como: completar a integración da Atención Primaria e a Atención Hospitalaria; a implantación dun novo modelo de Atención Primaria máis proactivo, resolutivo e cercano á cidadanía;  o impulso á mellora continua dos centros hospitalarios; a aposta por novas vías rápidas;  e a xestión dos pacientes crónicos e pluripatolóxicos.

Neste proceso está a nomear catro novos xerentes, todos eles médicos, de perfil innovador e con experiencia en postos de xestión sanitaria, para as EOXIs de Santiago, de A Coruña, de Ourense e de Pontevedra, polo que os novos directivos quedarían como segue:

EOXI de A Coruña. Luis Verde Remeseiro.

Licenciado en Medicina e Cirurxía pola Universidade de Santiago, é médico de Familia en Atención Primaria do Sergas. O doutor Verde ten unha amplia experiencia en equipos directivos. Pasou por cargos directivos como director xerente da xerencia sanitaria de Atención Primaria de A Coruña-Ferrol do Sergas entre os anos 1998 e 2005. Dende 2009 ocupou durante case tres anos a xerencia da actual EOXI de Ferrol, e actualmente ata onte vén de ocupar a xerencia da EOXI de Santiago.

EOXI de Santiago. Eloína Núñez Masid.

Licenciada en Medicina e Cirurxía pola Universidade de Santiago, ten unha experiencia de máis de 15 anos en postos de dirección e xestión, ocupando cargos como o de dirección xerente de Atención Primaria de Ourense en 2002, xerente do Complexo Hospitalario Universitario de Ourense no ano 2009, e actualmente vén de ocupar a xerencia da EOXI de Ourense.
EOXI de Pontevedra. José Ramón Gómez Fernández.

Licenciado co grado de Medicina e Cirurxía pola Universidade de Santiago, é  funcionario do Corpo Facultativo Superior da Xunta de Galicia, Escala de Saúde Pública e Administración Sanitaria. Durante os últimos anos ocupou diversas subdireccións e direccións, os últimos anos na EOXI de Santiago. Ata a actualidade viña ocupando a Dirección de Procesos sen Ingreso e Urxencias da EOXI da capital de Galicia.

EOXI de Ourense. Dionisio López Bellido.

Licenciado en Medicina e Cirurxía pola Universidade de Salamanca, é especialista en Uroloxía polo Hospital Puerta de Hierro de Madrid. O doutor Dionisio López ten experiencia en xestión de calidade e dirección de proxectos. Leva máis de dez anos en postos de xefaturas e xerencias, ocupando ata a actualidade a xefatura do Servizo de Uroloxía da EOXI de Ourense, Verín e O Barco de Valdeorras.

O Servizo Galego de Saúde agradece a dedicación, implicación e traballo realizado polos xerentes saíntes, nunha etapa especialmente complexa para a sanidade a raíz da crise económica que veu padecendo o país durante estes últimos anos.