Sinalan que a implantación das tecnoloxías disruptivas, como a intelixencia artificial, require dun enfoque multidisciplinar

Sinala que a futura Estratexia Dixital de Galicia 2030 terá especialmente en conta as achegas do ámbito humanístico, xurídico ou económico para sacar o máximo da tecnoloxía e construír a sociedade que queremos
📣 Publicado por el 26/06/2019 en la sección de Internet - Telefonía - Xunta de Galicia

Sinalan que a implantación das tecnoloxías disruptivas, como a intelixencia artificial, require dun enfoque multidisciplinar

A directora da Axencia para a Modernización Tecnolóxica de Galicia, Amtega, Mar Pereira sinalou hoxe que aplicación das tecnoloxías disruptivas ten un importante potencial para o desenvolvemento económico de España, pero que é preciso minimizar os seus riscos, polo que a regulación e a educación social serán esenciais.

A responsable da política tecnolóxica da Xunta participou hoxe en Madrid na Xornada España na Europa da Intelixencia Artificial, organizada por EY e Deusto Bussines School, onde incidiu en que a aplicación da intelixencia artificial a diferentes sectores económicos enfróntase a importantes dilemas éticos e que, como todas as tecnoloxías disruptivas, precisará dun enfoque multidisciplinar para maximizar o seu potencial e configurar a sociedade que realmente queremos.

Neste sentido, Pereira, lembrou que Galicia vén de lanzar o proceso de elaboración da súa Estratexia Dixital 2030, edg2030, na que, xunto coas achegas do sector, terán un papel outros ámbitos como o humanístico e ético, o xurídico ou o económico.

A edg2030 inicia a vindeira semana un proceso aberto e participativo de elaboración en colaboración coas 3 universidades galegas e establece catro vectores de análise: a igualdade dixital, o uso responsable e ético das tecnoloxías dixitais, o reforzo e especialización do ecosistema dixital, e o liderado transformador baseado no uso intelixente da tecnoloxía.

A directora da Amtega sinalou que esta folla de ruta para a vindeira década pivotará sobre o potencial transformador das tecnoloxías disruptivas, e por iso desde a Administración quérese reforzar as capacidades de Galicia nas novas redes de alta capacidade, na análise intelixente do dato, na intelixencia artificial, ou na ciberseguridade.

A Estratexia Dixital de Galicia 2030 quere contribuír a un desenvolvemento sostible da Comunidade tanto a nivel económico, como social e medioambiental. Esta nova folla de ruta para a vindeira década enmárcase na políticas europeas para incrementar o despregamento de tecnoloxías dixitais clave a gran escala e promover a súa adopción para que os beneficios da transformación dixital cheguen a todo o mundo.

Comentar noticia

Your email address will not be published.