Talía leva á Axencia de Lectura de Domaio a súa obra infantil Rosa Caramelo

Publicado por o día 26/04/2017 na sección de Cultura,Vigo

Talía leva á Axencia de Lectura de Domaio a súa obra infantil Rosa Caramelo

Talía Teatro presentará este venres ás 18:00 h na Axencia de Lectura de Domaio o seu espectáculo infantil ‘Rosa caramelo e outras historias’. A actuación enmárcase dentro do programa “Ler conta moito” desenvolvido pola Xunta de Galicia.

Dirixida por Paula Carballeira- autora teatral, poeta e actriz-, o contacontos está protagonizado polo actor Artur Trillo e diríxese a nenos e nenas de entre 4 e 8 anos de idade. A obra achega aos máis cativos os relatos da italiana Adela Turín, que comezou a publicar a súa colección de historias fabuladas hai máis de 30 anos no seu país natal, converténdose axiña nunha serie de referencia internacional para a educación na igualdade.

Con esta montaxe, Talía Teatro leva a escena catro dos seus relatos máis populares: ‘Rosa caramelo’, ‘A historia dos bonobos con lentes’, ‘Unha feliz catástrofe’ e ‘Artur e Clementina’, todos eles publicados en galego, catalán e castelán pola editorial Kalandraka dentro da colección dedicada á autora italiana. A través destas historias, a compañia dálle a volta aos roles de xénero e os seus estereotipos, desmontando unha serie de ideas impostas e simplificadas, pero fortemente asumidas, sobre certas actitudes e aptitudes de mulleres e homes.