Tres investigación do II Galicia Sur logran financiamento do instituto de saúde Carlos III

Os proxectos refírense ao impacto social da EPOC, á prevención da depresión nas empresas e aos deterioros cognitivos en pacientes con depresión
Publicado por o día 03/12/2018 na sección de Galicia,Sanidad,Vigo

Tres investigación do II Galicia Sur logran financiamento do instituto de saúde Carlos III

Tres proxectos do Instituto de Investigación Sanitaria Galicia Sur (IISGS), lograron obter financiamento do prestixioso Instituto de Saúde Carlos III para a súa posta en marcha. Os tres presentáronse á convocatoria para Proxectos de Investigación da Acción Estratéxica en Saúde 2018. Os grupos NeumoVigoI+i; Neurociencia Traslacional; e I-Saúde son os beneficiarios destas axudas, e recibirán en conxunto 180.000 € que lles permitirán pór en práctica as súas propostas a comezos de 2019.

A Acción Estratéxica en Saúde está promovida polo Instituto de Saúde Carlos III (Ministerio de Ciencia, Innovación e Universidades) e é a principal ferramenta de financiamento público de I+D+i no ámbito da investigación traslacional en biomedicina e fomento da súa actividade investigadora. O seu principal obxectivo é contribuír a fomentar a saúde e o benestar da cidadanía, así como desenvolver os aspectos preventivos, diagnósticos, curativos, rehabilitadores e paliativos da enfermidade, reforzando e incrementando a competitividade internacional da I+D+i do Sistema Nacional de Saúde.

Comprende un conxunto de actuacións destinadas a promover a mobilidade do persoal de investigación, o fortalecemento das estruturas da I+D+i en rede e o desenvolvemento de proxectos de investigación en Saúde. A esta última modalidade concorren anualmente uns 1.800 equipos de investigación de entidades e institucións sanitarias, organismos públicos de investigación e Universidades, dos cales ao redor dun 35% consegue financiamento, o que a converte nunha das actuacións máis competitivas no ámbito investigador.

A dimensión social da EPOC

O “Estudio SocioEpoc” (Grupo NeumoVigoI+i) está dirixido polo doutor Alberto Fernández Villar, xefe do Servizo de Pneumoloxía do CHUVI. Este proxecto estudará os factores sociosanitarios
relacionados co consumo de recursos sanitarios e o prognóstico de pacientes hospitalizados por unha agudización de EPOC (Enfermidade Pulmonar Obstrutiva Crónica).

É un estudo pioneiro en incluír a dimensión sociosanitaria, cunha adecuada valoración da problemática social destes pacientes e a súa contorna (situación económica, vivenda, recursos, apoio
familiar, sobrecarga do coidador, dependencia e outros).

A depresión no mundo laboral

O ensaio multicéntrico “Prevención da depresión no medio laboral mediante unha intervención personalizada baseada en algoritmos de risco, TICs e sistemas de axuda ás decisións: ensaio controlado aleatorio (Grupo I-Saúde)” ten como obxectivo principal deseñar, desenvolver e avaliar unha intervención personalizada para previr a depresión no ámbito laboral, baseada en tecnoloxías da información e comunicación (TICs), algoritmos de risco predictivos e sistemas de apoio ás decisións para os traballadores empregados.

Trátase dun ensaio que se realizará en poboación traballadora de empresas públicas ou privadas de 7 provincias de 6 comunidades autónomas españolas (Andalucía, Aragón, Castela-León, Cataluña, Baleares e Galicia). A investigadora principal en Galicia é Julia Bóveda Fontán, médica de familia do Centro de Saúde Pintor Colmeiro da EOXI de Vigo.

O deterioro cognitivo na depresión

O terceiro proxecto que obtivo financiamento é “Busca de biomarcadores e estudo do microARNoma do deterioro cognitivo asociado á depresión (Grupo Neurociencia Traslacional)”.

Trátase dun proxecto dirixido ao desenvolvemento de novos marcadores clínicos e biolóxicos que permitan detectar a deterioración cognitiva asociada ao trastorno depresivo maior. Consiste, basicamente, en identificar a demencia antes de que apareza, a través do estudo de pacientes depresivos con trastornos cognitivos maiores de 50 anos.

Está liderado por Roberto Carlos Agís Balboa investigador Ramón e Cajal e José Manuel Olivares, xefe de servizo de Psiquiatría do CHUVI, ambos do grupo de Neurociencia Traslacional.