Un operario evacuado en helicóptero ao sufrir un accidente cunha plataforma elevadora nun viveiro en Arzúa

Publicado por o día 12/08/2020 na sección de Sucesos

Un operario evacuado en helicóptero ao sufrir un accidente cunha plataforma elevadora nun viveiro en Arzúa

Un home resultou ferido de consideración esta tarde ao sufrir un accidente cunha plataforma elevadora mentres traballaba nun viveiro na parroquia arzuá de Campo.
 
Tras a chamada dunha persoa particular ao 112 Galicia preto das 15:45 horas activouse un operativo no que interviñeron os efectivos de Urxencias Sanitarias de Galicia-061, que se desprazaron ata o lugar dos feitos a bordo dun helicóptero medicalizado para atender ao operario e no que foi finalmente trasladado ao centro hospitalario de referencia.
 
Cómpre salientar que, para prestar apoio e colaboración ao equipo médico mobilizado na aeronave, desde o CIAE 112 Galicia solicitouse a intervención da Garda Civil e da Agrupación de Voluntarios de Protección Civil de Arzúa.
 

Dous adultos e un menor feridos ao caer por un desnivel a furgoneta na que viaxaban en Toques

 
Dous adultos e un menor resultaron feridos esta tarde en Toques despois de que a furgoneta na que circulaban se saíse da vía e caese por un terraplén duns seis metros. Segundo se lle indicou ao 112 Galicia, a intervención dos Bombeiros de Arzúa fixo posible que as tres persoas accidentadas, malia que se atopaban liberadas e accesibles, conseguisen saír desta zona, ao ser rescatadas e levadas ata a ambulancia, onde recibiron asistencia médica.
 
O sinistro produciuse na DP-4604, concretamente no punto quilométrico 10, ao fío das 15: 45 horas.
 
Foi unha das persoas implicadas no accidente quen alertou da súa situación ao 112 Galicia, o que permitiu activar un operativo no que interviñeron os Bombeiros de Arzúa, os efectivos de Urxencias Sanitarias de Galicia-061 e os axentes da Garda Civil de Tráfico.
 

Saída de vía en Vila de Cruces

 
Por outra banda, unha muller precisou asistencia sanitaria esta tarde en Vila de Cruces ao saírse da vía o turismo que conducía e caer por un barranco.
 
O accidente ocorreu na estrada que une Silleda e Vila de Cruces, nas proximidades do lugar de Fontao.
 
Ao fío das 18:00 horas, unha persoa particular alertou do sinistro ao 112 Galicia e, decontado, o persoal do CIAE 112 Galicia puxo a situación en coñecemento de Urxencias Sanitarias de Galicia-061, da Garda Civil de Tráfico, da Policía Local, do GES de Lalín e de Protección Civil da localidade.
 

Un incendio deixa danos nunha casa en Dodro

 
Un incendio declarado esta tarde nunha casa en Dodro provocou severos danos na vivenda, sen que ningunha persoa resultase ferida.
 
Segundo os datos facilitados ao 112 Galicia, as lapas calcinaron as estancias do primeiro e do segundo andar e afectaron ao tellado da casa, que colapsou. Por outra banda, na planta baixa, os servizos de emerxencia conseguiron evitar que o lume afectase a dúas habitacións, a unha adega e a unha cociña.
 
Os feitos sucederon no lugar de Bexo, na parroquia de San Xoán de Laíño, ao fío das 14:40 horas. Nese momento, unha persoa particular contactou co 112 Galicia para dar conta do incendio.
 
A partir de aí, os xestores do CIAE 112 Galicia pasaron o aviso aos Bombeiros de Boiro e Ribeira, ao GES de Padrón e á Garda Civil.
 
As labores de extinción do lume e os traballos de balizado da vivenda finalizaron, segundo puido saber o 112 Galicia, preto das 17:15 horas.

Comentar noticia

Your email address will not be published.