Un sistema robotizado mellora a calidade e reduce custes no control de obras de edificación

Un sistema robotizado que reduce custos, axiliza obras e mellora a supervisión da calidade no control de obras de  edificación. Isto son os tres principais logros que se conseguiron con Auto-BIM, un proxecto de investigación enmarcado no programa Retos-Colaboración 2016, financiado con preto dun millón de euros e posto en marcha por un consorcio liderado pola empresa Vías y construcciones e no que tamén participa o grupo de investigación en Xeotecnoloxías Aplicadas da Universidade de Vigo. A piques de rematar o proxecto –farao o vindeiro mes de marzo- realizouse unha proba piloto xeral do novo sistema na que participaron todos os socios e na que se demostrou a súa valía.

Para levar a cabo esta proba piloto elixiuse un bloque de vivendas en construción na localidade catalá de Badalona e os resultados acadados demostraron que o software deseñado axuda notablemente á redución de tempos e á sistematización e mellora global no replanteo e control de calidade de obras de edificación, informatizando o proceso de seguimento da evolución de obra e detección de desviacións respecto ao planeado, o que se traduce na redución de custes, axilización das obras e mellora da calidade.

“Este proxecto púxose en marcha co obxectivo de crear e validar unha nova metodoloxía para a adquisición, procesado e xestión de datos espaciais tridimensionais en espazos interiores sen cobertura GNSS, o sistema global de navegación por satélite”, explica Lucía Díaz-Vilariño, investigadora do Grupo de Xeotecnoloxías Aplicadas, ao que engade que, finalmente, a adquisición de datos encárgase de realizala un robot móbil autónomo e os resultados obtidos son integrados en modelos de información estandarizados BIM (Building Information Modelling).

Unha app permite a planificación óptima da toma de datos

Dentro do marco deste proxecto, o grupo de investigación en Xeotecnoloxías Aplicadas da Universidade de Vigo foi o encargado de deseñar a aplicación que permite a planificación óptima da toma de datos por parte da unidade robotizada nas distintas fases da obra dun edificio en construción. Pola súa banda, o centro tecnolóxico Aimen encargouse de desenvolver o sistema robotizado autónomo; a empresa Aplitop, como entidade experta en tratamento de nubes de puntos, ocupouse do seu filtrado, aliñamento e referenciación; ApliCAD e o grupo de investigación Tidop da Universidade de Salamanca desenvolveron os algoritmos para a extracción semántica e comparación con modelos BIM e o grupo BAC Engineering Consultancy definiu os criterios de calidade da nube de puntos determinando criterios de aceptación e/ou rexeitamento das xeometrías obtidas co sistema robótico autónomo..