Unha colisión múltiple en Nigrán sáldase con dúas persoas feridas

Publicado por o día 15/10/2018 na sección de Xunta de Galicia

Unha colisión múltiple en Nigrán sáldase con dúas persoas feridas

Dúas persoas resultaron feridas esta tarde en Nigrán nunha colisión na que se viron implicados catro vehículos. O accidente tivo lugar na PO-552, concretamente no punto quilométrico 11, ao fío das 15:55 horas.

Nese momento, os axentes da Policía Local de Nigrán alertaban do ocorrido ao 112 Galicia e, decontado, o persoal do 112 Galicia pasaba o aviso ao 061-Urxencias Sanitarias, ao GES do Val Miñor e á Garda Civil de Tráfico.

Saída de vía

Por outra banda, en Tui, unha persoa tivo que ser excarcerada polos Bombeiros do Porriño tras saírse da vía o turismo no que viaxaba. Ademais, debido ao accidente, se viron afectados un poste do alumeado público e outro da liña telefónica.

Sucedeu na A-55, na saída Tui Norte, en sentido Portugal.

O 112 Galicia tivo constancia do sinistro uns minutos despois das 16:15 horas, a través da alerta dunha persoa particular. Acto seguido, os xestores do 112 Galicia puxeron a situación en coñecemento do 061-Urxencias Sanitarias, da Garda Civil de Tráfico, dos Bombeiros do Porriño , da Policía Local e das empresas subministradoras de electricidade e conexión telefónica.

Dúas persoas feridas

Ademais, dúas persoas foron trasladadas a un centro hospitalario despois de que o coche no que circulaban rematase fóra da vía no termo municipal da Rúa. Ocorreu no punto quilométrico 468 da N-120, ao fío das 16:50 horas.

Segundo se lle indicou ao 112 Galicia,  tamén no mesmo punto tivo lugar unha colisión por alcance entre  dous vehículos, cuxos ocupantes detiveran a marcha para socorrer ás persoas feridas na saída de vía. Neste caso, non houbo que lamentar danos persoais.

Varios particulares contactaban co 112 Galicia para alertar do sinistro e indicaban no seu relato que unha das persoas feridas se atopaba atrapada.

Así, ata o lugar do sinistro acudiron, tras recibir o aviso do persoal do 112 Galicia, os efectivos sanitarios do 061-Urxencias Sanitarias, os Bombeiros e o GES de Valdeorras, a Policía Local e a Garda Civil de Tráfico.

Unha vez no lugar dos feitos, os membros do Servizo de Prevención, Extinción de Incendios e Salvamento de Valdeorras descartaron empregar o material de excarceración. Iso si, axudaron ás persoas a saír do coche, que rematou nunha posición que impedía aos seus ocupantes saír polo seu propio pé.