Unha persoa excarcerada tras unha colisión entre dous coches en Arteixo

Por o 24/01/2018 | Sección: Sucesos
Unha persoa excarcerada tras unha colisión entre dous coches en Arteixo

Unha persoa resultou ferida esta tarde despois de producirse unha colisión entre dous coches en Arteixo. Segundo os datos facilitados ao 112 Galicia, a vítima tivo que ser excarcerada polos bombeiros da localidade ao quedar atrapada no interior do vehículo accidentado.

O accidente tivo lugar na Avenida da Prensa, ao fío das 14:45 horas. Nese momento, un particular contactaba co 112 Galicia para dar conta do sinistro. Indicaba que unha persoa atopábase ferida e inconsciente.

Decontado, o persoal do Centro Integrado de Atención ás Emerxencias (CIAE) 112 Galicia pasaba o aviso ao 061-Urxencias Sanitarias, á Policía Local, aos Bombeiros de Arteixo e a Protección Civil.

Turismo envorcado
Por outra banda, en Ames, unha persoa tivo que ser atendida por un equipo do 061-Urxencias Sanitarias ao envorcar o turismo no que viaxaba. Segundo se lle indicou ao 112 Galicia, a persoa ferida foi trasladada ata o Complexo Hospitalario Universitario de Santiago.

O accidente produciuse no lugar de Paramuíño, na parroquia de Biduído. O 112 Galicia tivo constancia do sinistro a través da alerta do persoal médico ás 16:00 horas.

A partir de aí, dende o CIAE púxose a situación en coñecemento da Garda Civil de Tráfico, de Protección Civil e  dos Bombeiros de Santiago.

Camión accidentado
Por último, un camión colidía cun ferro na A-55, ao seu paso polo Porriño, o que provocou que o depósito de combustible do vehículo se perforase e perdese 300 litros de gasoil. Segundo puido saber o 112 Galicia, parte da vertedura rematou nun regato do río Louro e na cuneta.

O sinistro ocorreu na saída do Polígono das Gándaras, no carril de incorporación á autovía, sentido Vigo.

O 112 Galicia recibía a alerta dos feitos ás 14:25 horas, a través do aviso do camioneiro, que resultou ileso.

Acto seguido, o persoal do CIAE informaba do sucedido á Garda Civil de Tráfico, ao servizo de mantemento da vía, a Protección Civil e aos Bombeiros do Baixo Miño.

Unha vez lugar do accidente, os servizos de emerxencias empregaron material absorbente para reter a vertedura, cuxa mancha alcanzou os 250 metros de extensión.