Unha persoa trasladada por inhalación de fume tras producirse un incendio na súa vivenda en Santiago

Publicado por o día 15/05/2020 na sección de Sucesos

Unha persoa trasladada por inhalación de fume tras producirse un incendio na súa vivenda en Santiago

Un incendio provocado por unha tixola esquecida ao lume rematou con unha persoa evacuada ao Hospital Clínico con síntomas de intoxicación por inhalación de fume. Os feitos tiveron lugar ás 20:30 horas da pasada noite na Avenida de Vilagarcía, en Santiago de Compostela.

A esa hora, varios particulares contactaron co 112 Galicia para informar dos feitos. Segundo o relato dos alertantes, víase saír moito fume do interior dunha das vivendas dun edificio localizado á altura do número 11.

De inmediato, os xestores do Centro Integrado de Atención ás emerxencias (CIAE) 112 Galicia puxeron os feitos en coñecemento dos profesionais de Urxencias Sanitarias de Galicia-061, dos Bombeiros de Santiago e tamén dos axentes da Policía Nacional e Local.

Unha vez no lugar, os equipos de extinción lograron controlar o lume e confirmaron que unha persoa foi evacuada polos servizos sanitarios.

Desde o 112 Galicia avisouse tamén aos membros de Protección Civil da localidade por se fose necesaria a súa colaboración.

Incendio en Xunqueira de Ambía

Por outra banda, un incendio calcinou por completo o baixo dunha casa en Xunqueira de Ambía, Ourense, sen, afortunadamente, causar danos persoais.

Ás 19:00 horas de onte, unha persoa particular chamou ao 112 Galicia para solicitar medios de extinción para unha vivenda no lugar de Sanxillao. Así, nada máis ter constancia do suceso, desde o CIAE pasouse aviso ao servizo sanitario e aos Bombeiros de Xinzo de Limia.

Tras rematar a intervención, os membros do Servizo de Prevención Extinción de Incendios e Salvamento confirmaron que o piso inferior da vivenda rematou completamente calcinado e que o fume afectou ao andar superior.

Cómpre sinalar que neste operativo tamén participaron os axentes da Garda Civil e os membros de Protección Civil de Xunqueira de Ambía e de Allariz.

Comentar noticia

Your email address will not be published.