Vanessa Angustia: “Sobre todas as formas de amor que existen, o amor romántico susténtase nunha serie de mitos que poden dar lugar a situacións non desexables”

Publicado por o día 23/03/2018 na sección de Esquerda Unida,Política

Vanessa Angustia: “Sobre todas as formas de amor que existen, o amor romántico susténtase nunha serie de mitos que poden dar lugar a situacións non desexables”

Esquerda Unida organizou este xoves en Compostela a charla: “Desmontando o amor romántico”, impartida pola senadora de En Marea, Vanessa Angustia, coa que rematan os actos que levou a cabo a organización co tema central do feminismo e que forman parte da campaña “Co feminismo nos talóns: Que non che conten películas!”. O acto foi presentado pola concelleira de Mocidade de Compostela, Noa Morales.

“Desmontando o Amor Romántico” é unha charla na que Angustia indicou que, “sobre todas as formas de amor que existen, o amor romántico susténtase nunha serie de mitos que poden dar lugar a situacións non desexables dentro das relacións afectivas”.

“É imposible entender o amor romántico sen entender o patriarcado, que establece un sistema de dominación sexual. Concretamente, é a partir dos anos 70 cando as feministas teorizan sobre o patriarcado e a cuestión de dominación machista, unha estratexia na que se deixa ás mulleres como as responsables das tarefas do fogar ou dos coidados”, expón a senadora.

“As mulleres vivimos con culpabilidade, xa que é moi difícil ter liberdade cando non podemos decidir sobre os nosos propios corpos, vidas ou sexualidade: a ferramenta que domina o patriarcado”, asume.

“Un problema da parella patriarcal é que acaba por ser unha institución política que está sustentada pola ‘heteronormalidade’, xa que para a sociedade só existe unha opción sexual, algo que non é certo. Limitar as nosas opcións sexuais é unha ferramenta de control masculina e machista, unha forma de ter garantido o acceso sexual ás mulleres e unha imposición pola que construír un proxecto de amor”, sinala.