Vigo acolle un encontro europeo sobre fotónica, a tecnoloxía do futuro

Vigo acolle o próximo 5 de decembro un encontro europeo sobre fotónica, a denominada tecnoloxía do futuro. Trátase dunha xornada orientada ás empresas galegas co fin de dar a coñecer, con casos prácticos, os usos desta tecnoloxía nos procesos industriais.

A xornada, baixo o título “Fotónica integrada: casos prácticos e aplicacións na industria”, servirá tamén de lanzamento dun programa europeo que coordina a Universidade de Vigo, en colaboración coa empresa holandesa Smart Photonics. Trátase dun programa para capacitar a catro profesionais da Unión Europea na fotónica integrada, concedido ao equipo da Universidade de Vigo, dirixido polo investigador e subdirector de AtlanTTic, Francisco Díaz.

Ao encontro, que terá lugar en Zona Franca, asistirán empresas vinculadas principalmente coa automoción, as tecnoloxías, o téxtil, a alimentación e a saúde. Participarán como relatores os máis destacados expertos europeos en fotónica integrada como Auri Ripoll (directora de márketing de EPIC), Ronald Broeke (director xeral de Bright Photonics) e Francisco Soares, un dos máximos responsables do Instituto Fraunhofer Heinrich Hertz.