Vigo retoma desde este luns o funcionamento da “zona azul”

Aprobada pola Xunta de Goberno Local, a medida entrará en vigor este luns 1 de xuño e pon fin á pausa do servizo ordenada o 18 de marzo polo estado de alarma. Coa paulatina apertura da mobilidade e a actividade industrial e comercial, cesan as causas que motivaron a suspensión da XER.

O alcalde informou este venres da decisión adoptada pola Xunta de Goberno Local que conclúe coa suspensión iniciada o 18 de marzo e retoma desde este luns, 1 de xuño, o funcionamento habitual da “Xestión de Estacionamento Regulado”, a coñecida como “zona azul”.

O contrato paralizouse entón ante a imposibilidade de executalo dadas as restricións impostas no decreto do estado de alarma. A fase 2 da desescalada trae consigo aperturas na mobilidade cidadá e a reactivación parcial da industria e o comercio, pola que se considera que as causas da suspensión decaen.

Polo tanto, desde este luns volve operar a rotación no aparcamento en vía pública, nas mesmas condicións nas que funcionaba antes da paralización e establecendo a empresa as medidas de seguridade necesarias para a volta ao traballo do persoal.

Benestar

Segundo trasladou este venres Abel Caballero, a Xunta de Goberno Local deu luz verde a unha addenda ao convenio rubricado coa asociación Vida Digna para o mantemento dun comedor social e da entrega de alimentación a persoas en situación ou risco de exclusión social. O acordo, firmado para o período 2019-2021, contempla un apoio municipal de 45.000 euros anuais e a addenda anticipa o abono destas cantidades.

Coa crise do coronavirus e o incremento da demanda, o goberno de Vigo decidiu validar un cambio nos tempos de pago. Previo á addenda, a entidade recibía o 50% no primeiro trimestre do ano e a segunda metade da contía, ao final do ano natural; agora o Concello pasará a transferir o segundo 50% unha vez a entidade xustifique o gasto do primeiro 50%.

Igualdade

O rexedor informou ademais da decisión municipal de ceder unha vivenda durante seis meses a unha muller cunha filla vítima de violencia machista. A familia contará con apoio profesional durante este tempo e ocupará unha das tres residencias coas que conta o Concello para darlles acollida temporal. Como complemento, o goberno vigués adxudicou a pasada semana un contrato de aloxamento e manutención temporal en establecementos hoteleiros para vítimas de violencia machista, por importe de 24.300 euros.

Deporte de base

Por último, Caballero deu conta da aprobación das bases reguladoras e da convocatoria de subvencións a entidades deportivas sen ánimo de lucro pola súa actividade na tempada deportiva que conclúe, correspondente aos anos 2019/2020. O goberno vigués reserva ao efecto unha partida de 925.000 euros, que serán distribuídos en réxime de concorrencia competitiva.

Como figura nos requisitos, poden optar os clubs deportivos, asociacións, agrupacións e entidades deportivas con sede en Vigo e sen ánimo de lucro. As solicitudes poderán presentarse no prazo de vinte días despois da publicación do extracto da convocatoria no BOP.

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.

SIGUENOS EN TELEGRAM