Vive o oficio tradicional da vendima nas Rías Baixas nunha fortaleza de lenda

O programa “vendima con nós” ofrece visitas guiadas este fin de semana aos viñedos do castelo de Soutomaior para dar a coñecer a vitivinicultura da provincia de Pontevedra
Publicado por o día 22/09/2018 na sección de Deputación de Pontevedra,Turismo

Vive o oficio tradicional da vendima nas Rías Baixas nunha fortaleza de lenda

Este fin de semana “vendima con nós”, programa da Deputación de Pontevedra, brinda a oportunidade ás e aos amantes da viticultura de coñecer en primeira persoa os viñedos do castelo de Soutomaior durante a época de vendima, que acaba de arrincar.

Esta iniciativa celebrarase este fin de semana, o sábado e o domingo, de 12 h a 17 h. Para a actividade é necesario realizar a inscrición mediante o correo electrónico do castelo de Soutomaior, posto que as prazas están limitadas ata chegar a un máximo de grupos de 25 persoas.

Descobre as reviravoltas deste oficio histórico das Rías Baixas

Esta actividade terá como punto de partida a entrada do castelo. Desde alí, as e os participantes desprazaranse ata os viñedos para realizar un percorrido de dous quilómetros cunha duración aproximada dunha hora. Na visita, as e os asistentes recibirán unha explicación sobre a vitivinicultura da provincia de Pontevedra, que incluirá algúns aspectos como os tipos de uva, a situación e traxectoria dos viñedos, en que consiste a vendima e outras explicacións relacionadas con esta tarefa.

Esta experiencia enoturística única e diferente realízase no momento idóneo, xa que é época de recollida da uva e prevese que comecen os traballos de explotación nos viñedos da fortaleza para partir do día 25 de setembro. Aquelas e aqueles que o desexen poderán achegarse ao castelo de Soutomaior e contemplar en vivo este oficio tradicional das Rías Baixas.

Que ver no castelo de Soutomaior

Os viñedos forman parte dunha das sendas deste fermoso e histórico castelo, que conta cunha contorna de 25 hectáreas.

O seu exterior está considerado o xardín botánico máis importante de Galicia, que ademais ofrece outros dous itinerarios, un polas camelias centenarias e outro polo seu magnífico bosque.

Esta fortaleza medieval orixinaria do século XII está formada por dúas torres unidas por un edificio habitable e un patio de armas, dentro dun recito dobremente amurallado.

Deste complexo fortificado destaca a ponte levadiza que comunica cunha das torres. Neste punto poderás coñecer máis a fondo a historia deste castelo grazas ao seu museo.

A colección do novo museo do castelo de Soutomaior, que poderás coñecer nun percorrido aproximado de 45 minutos, inclúe algunhas das técnicas máis vangardistas de musealización, con sete audiovisuais, recreacións en 3d, videomapping, caixas máxicas e contidos de carácter didáctico, que fan deste un plan perfecto para toda a familia.