Xabier Gómez e Alejandro de León gañan os torneos de xadrez celebrados a fin de semana no campus

O Edificio de Ferro tamén acolleu Copa Deputación na modalidade lóstrego
Publicado por o día 15/10/2018 na sección de Galicia,Ourense,Universidade de Vigo

Xabier Gómez e Alejandro de León gañan os torneos de xadrez celebrados a fin de semana no campus

O Edificio de Ferro do campus de Ourense acolleu esta fin de semana dúas citas de xadrez nas que a organización correu a cargo do Club Universitario de Ourense de Xadrez. Trátase do Torneo Activo Campus Ourense 2018, que gañou Xabier Gómez, e da Copa Deputación na modalidade lóstrego, que gañou Alejandro de León.

A primeira das citas foi a competición provincial, que tivo lugar o sábado día 13 de outubro. A Copa Deputación na modalidade lóstrego disputouse polo sistema suízo a sete rondas cun total de 80 participantes. O campión do torneo foi Alejandro de León, do Xadrez Ourense, seguido de César Pérez, do Universitario de Ourense, e en terceiro lugar Salvador Rey, do Xadrez Ourense. A campioa feminina foi Elvira Jing Negreira, do Xadrez Ourense.

A segunda das competicións foi o Torneo Activo Campus Ourense 2018, celebrado o domingo 14 de outubro. A competición disputouse polo sistema suízo a seis rondas cun total de 52 participantes. O campión foi Xabier Gómez, do Xadrez Benchoshey, seguido de Marcos Lorenzo, do Liceo de Ourense, e en terceiro lugar Martín Boado, do Círculo Chantadino. A campioa feminina foi Pura Diéguez, do Xadrez Benchoshey.