Publicado por 
A conselleira de Infraestruturas e Vivenda, Ethel Vázquez e o conselleiro de Cultura, Educación e Ordenación Universitaria, Román Rodríguez, xunto cos secretarios xerais técnicos das respectivas consellerías, Joaquín Macho e Jesús Oitavén, e o director xeral de Mobilidade, Ignacio Maestro, mantiveron un encontro para analizar a incidencia da folga do transporte público, no que acordaron a apertura de expedientes informativos ante o elevado incumprimento dos servizos mínimos, con miles de alumnos e familias afectados. O Goberno galego, unha vez iniciados estes expedientes ás empresas e analizados os datos necesarios, avaliará se é precisa a imposición de sancións.
Vázquez Mourelle lamentou que o incumprimento dos servizos mínimos de transporte estea a vulnerar o dereito á educación dos menores e a ocasionar molestias aos seus familiares.
A conselleira desmentiu rotundamente que o novo Plan de transporte público vaia supoñer a redución de 1.000 empregos, xa que se descartan a supresión de servizos. Neste sentido, precisou que sucede máis ben o contrario, pois este plan que está a impulsar a Xunta nace da premisa de garantir os postos de traballo no sector, que incluso se incrementarán ao aumentar substancialmente o número de coidadores coa fin de velar pola seguridade dos escolares nos autobuses.
Ethel Vázquez reiterou que a Xunta mantén as portas abertas para abordar o plan, pero subliñou que o incumprimento dos servizos non son o camiño do diálogo.
Pola súa banda, o conselleiro de Cultura, Educación e Ordenación Universitaria, Román Rodríguez tamén lamentou o incumprimento dos servizos mínimos, que no caso do transporte escolar está vulnerando o dereito á educación dos alumnos e impedíndolles acudir aos seus centros escolares. Ademais, engadiu que esta situación tamén está a prexudicar á conciliación das familias.
Román Rodríguez fixo un chamamento á responsabilidade que faga compatible o exercicio lexítimo da folga co cumprimento dos servizos mínimos e o respecto aos dereitos do conxunto da cidadanía.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
