A Xunta apoia investimentos empresariais de máis de 8 millóns de euros para a creación e consolidación de novas empresas

A Consellería de Economía, Emprego e Industria, a través do programa Galicia Emprende, concede axudas por 2,8 millóns de euros para apoiar 72 proxectos de emprendedores e autónomos e para favorecer a contratación e mantemento de 175 empregados
Por o 14/01/2018 | Sección: Economia,Empresas
A Xunta apoia investimentos empresariais de máis de 8 millóns de euros para a creación e consolidación de novas empresas

A Xunta concedeu axudas por 2,8 millóns de euros para apoiar 72 proxectos empresariais de emprendedores e autónomos, dentro do programa Galicia Emprende 2017. As iniciativas aprobadas prevén a mobilización de máis de 8 millóns de euros en investimentos que levan asociada a creación e mantemento de 175 empregos.

Os proxectos abranguen, entre outras, actividades do sector industrial como soldadura e construción de estruturas metálicas, elaboración e comercialización de viño, fabricación de produtos ortopédicos ou de compoñentes electrónicos; e actividades de servizos relacionadas coa fisioterapia, comercialización de produtos delicatessen, aluguer de maquinaria ou asistencia a persoas maiores.

O investimento medio por proxecto aprobado no marco do programa Galicia Emprende é de máis de 113.000 euros, un 36% máis que na edición anterior. O 51% dos proxectos aprobados corresponden a autónomos, e o resto a sociedades mercantís.

O programa Galicia Emprende apoia proxectos de investimento comprendidos entre os 25.000 e os 500.000 euros, con axudas que poden cubrir o 30% no caso das pequenas empresas e o 20% para medianas. Esta liña de axudas está deseñada para apoiar a posta en marcha de proxectos de nova creación ou a consolidación, durante os primeiros 42 meses de funcionamento, de empresas promovidas en Galicia por emprendedores ou autónomos.

Galicia Rural Emprende

Esta iniciativa da Consellería de Economía, Emprego e Industria compleméntase coa primeira edición do Galicia Rural Emprende, deseñado para promover a diversificación e creación de novas empresas non agrícolas no ámbito rural. Este novo programa facilitou no 2017 a concesión de 2,4 millóns de euros en axudas a 44 proxectos de autónomos e emprendedores, que mobilizan máis de 5 millóns de euros en investimentos. A segunda edición deste programa activarase en datas próximas.

Ademais das axudas directas activadas mediante os programas Galicia Emprende e Galicia Rural Emprende, os emprendedores poden acceder aos préstamos directos habilitados a través da nova liña Instrumentos Financeiros Innovadores (IFIs) ou do fondo de capital risco Galicia Iniciativas Emprendedoras, así como a microcréditos ou préstamos con xuros bonificados no marco do Programa Galicia 1000.

Deste xeito, a Xunta amosa o seu compromiso cos emprendedores e as pequenas e medianas empresas, favorecendo o acceso aos recursos e instrumentos necesarios para a posta en marcha de novos proxectos con mellores posibilidades de éxito e consolidación no mercado.

Noticias de última hora en Vigo

Comentar noticia

Your email address will not be published.