Xunta, Concello de Padrón e Fundación Cela impulsan a primeira ruta arredor da obra ‘Del Miño al Bidasoa’

Román Rodríguez destaca o “novidoso” deste proxecto e a súa importancia “para a promoción e difusión da obra de Cela”
Publicado por o día 21/09/2018 na sección de Cultura

Xunta, Concello de Padrón e Fundación Cela impulsan a primeira ruta arredor da obra ‘Del Miño al Bidasoa’

O conselleiro de Cultura, Educación e Ordenación Universitaria, Román Rodríguez, e o alcalde de Padrón, Antonio Fernández Angueira, realizaron a canda dun grupo de 60 alumnos dos institutos deste concello coruñés, o percorrido inaugural da ruta “Del Miño al Bidasoa”, para conmemorar o célebre libro de viaxes do Premio Nobel galego. Previamente, o alumnado participou nunha visita guiada ao renovado museo da Fundación Camilo José Cela.

Román Rodríguez explicou que con esta iniciativa “poñemos en marcha a primeira das rutas literarias relacionadas con este emblemático texto”. E concluíu afirmando que este é “un proxecto novidoso” que axudará á promoción e difusión da obra de Cela, “especialmente dos seus libros de viaxes”.

Contextualización da ruta

En febreiro de 2018, o Instituto Cervantes, a Deputación de Guadalaxara, Camilo José Cela Conde e a Fundación Pública Galega Camilo José Cela asinaron un protocolo de colaboración no que todas as partes expresaron a súa vontade de colaborar na realización de accións e actividades relacionadas coa promoción e a difusión nacional e internacional da obra de Camilo José Cela, e especialmente dos seus libros de viaxes.

Neste sentido, a Consellería de Cultura, Educación e Ordenación Universitaria e a Fundación Pública Galega Camilo José Cela, en colaboración co Concello de Padrón, poñen en marcha a primeira das rutas literarias relacionados co libro Del Miño al Bidasoa. Notas de un vagabundaje, no concello coruñés que viu nacer o noso Nobel.

Seis escenarios de Del Miño al Bidasoa

A ruta dentro do concello padronés sinaliza seis lugares presentes na antedita obra. Nestas placas reprodúcense fragmentos que Cela empregou para describir ou referenciar cada un dos espazos. Desde a entrada en Padrón, pasando pola Taberna do Cuco, o Xardín Botánico, a Igrexa de Santiago e a Casa do escritor Nicasio Pajares, até chegar ao Cemiterio de Adina, onde precisamente repousan os restos de Cela. Neste traxecto percórrense preto de tres quilómetros por importantes escenarios biográficos e literarios do escritor galego.
Desde a Consellería de Cultura estase a traballar para que esta iniciativa poida ser extrapolada aos máis de 30 concellos galegos que aparecen no libro e que abranguen desde As Neves (Pontevedra) até Ribadeo (Lugo). Na actualidade, xa está previsto promover rutas similares na contorna de Santiago de Compostela, de Ourense, A Coruña e Ribadeo.