A Xunta licita a adquisición de 30 vehículos todoterreo destinados á Policía Autonómica Escoitar

Refórzase así a capacidade de resposta deste corpo en materia de prevención e investigación de incendios forestais e doutros delitos contra o medio ambiente
Por o 21/06/2017 | Sección: Galicia,Xunta de Galicia
A Xunta licita a adquisición de 30 vehículos todoterreo destinados á Policía Autonómica Escoitar
Compartir en:

Diario Oficial de Galicia publica hoxe a licitación, a través dun procedemento aberto, de 30 vehículos todoterreo (tipo SUV 4×4) que se destinarán a reforzar os medios da Policía Autonómica.

O Goberno galego destinará 840.000 euros, cofinanciados por Fondos FEDER, á adquisición destes vehículos, preparados para actuar en terreos de difícil acceso. Estarán equipados con kits de recollida de mostras para o seu análise para aquelas situacións nas que se detecte a presenza de substancias que poidan ser prexudiciais para o medio ambiente.

A Policía Autonómica desenvolve desde 1994, a través das súas unidades de intervención no medio ambiente, tarefas de protección dos recursos naturais e do patrimonio forestal de Galicia e, moi especialmente, de prevención e investigación dos incendios forestais. De feito, o 56% dos efectivos deste corpo dedícanse a estas funcións.

Máis en concreto, os axentes encárganse da inspección, control e denuncia de residuos e verteduras de todo tipo; control de vertedoiros e de talas ilegais; e prevención e loita contra os lumes, a través do control de queimas ou da investigación de lumes provocados que poidan poñer en perigo a vida das persoas, dos seus bens ou da riqueza forestal de Galicia.

Con esta licitación, continúase na liña continua de mellora dos recursos da Policía Autonómica. Neste sentido, é preciso recordar que en 2015 xa se adquiriron 12 novos vehículos, e está previsto que entre 2015 e 2020 se renove o 90% do parque móbil da Policía Autonómica.