A Comisión Europea avalía positivamente o programa de excelencia HRS4R implantado na Universidade

Dous anos despois da súa posta en marcha na Universidade de Vigo, o Programa HRS4R Human Resources Strategy for Researches acaba de recibir a avaliación positiva da Comisión Europea, o organismo que impulsa o programa, que ten como obxectivo a implantación da estratexia e os principios da Carta Europea do Investigador e o Código de Conduta para a contratación de persoal investigador. “O resultado positivo é un recoñecemento a esta aposta estratéxica da Universidade para mellorar o ámbito da investigación e situarnos con visibilidade no Espazo Europeo de Investigación”, sinala Belén Rubio, vicerreitora de Investigación da Universidade de Vigo.

As e os avaliadores da Comisión destacan na súa diagnose os compromisos do goberno da Universidade por esta estratexia e o enfoque de mellorar os procesos relacionados coa carreira investigadora, tales como os principios éticos, a non discriminación, o compromiso coa sociedade ou a promoción da mobilidade. Entre os aspectos a mellorar, as e os responsables da avaliación sinalan a accesibilidade (procedementos, información pública) en inglés para o persoal investigador estranxeiro e a transparencia e internacionalización dos procesos de contratación ao longo da carreira investigadora. “Este modelo de excelencia esta baseado nos estándares de calidade na investigación definidos pola Comisión Europea a través da Carta Europea do Investigador e o Código de Conduta para Contratar Investigadores (C&C: The Carter & The Code), que está orientado a poñer en marcha as condicións necesarias na universidade para volvela máis atractiva cara á carreira profesional do seu persoal investigador e mellorar os resultados de investigación e a visibilidade da institución”, explica Belén Rubio, vicerreitora de Investigación.

Próximas accións

Tras esta avaliación intermedia, que xa estaba programada para mediados de ano, desde a posta en marcha do programa no ano 2017, os seguintes pasos están orientados á implantación das liñas de acción previstas nun horizonte de tres anos, de xeito que estes estándares sexan operativos sen importar o centro, grupo ou ámbito de investigación “e así poñer a Universidade en condicións de superar a visita da avaliación da Comisión Europea que se producirá no ano 2022”, adianta a vicerreitora.

A avaliación positiva da Comisión Europea do programa HRS4R prodúcese catro meses despois de que o Consello de Goberno da Universidade de Vigo aprobase a creación de catro grupos de traballo, que teñen o obxectivo de potenciar e mellorar o seu funcionamento, a través da participación de persoas de diferentes centros e servizos, con distintos perfís relacionados co eido da investigación.