A Xunta de Galicia abre o prazo de inscrición, ata cubrir prazas, para mozas e mozos de entre 18 e 30 anos que estean interesados en participar como voluntarios no Festival da Luz, que se celebrará os días 6, 7 e 8 de setembro no municipio coruñés de Boimorto. Esta iniciativa enmárcase no programa SON Voluntario/a da Dirección Xeral de Xuventude, Participación e Voluntariado.
Nesta ocasión ofértanse un total de 20 prazas, que serán adxudicadas por orde de anotación, sempre e cando os solicitantes cumpran os requisitos. O formulario de inscrición está dispoñible na páxina web de voluntariado galego.
As rapazas e rapaces que participen poderán acceder ao festival e recibirán un certificado de experiencias voluntarias expedido pola Dirección Xeral de Xuventude. Tamén estarán cubertos con seguro de accidentes e de responsabilidade civil.
En canto ás obrigas, deberán realizar un curso básico de voluntariado e asistir a unha reunión previa á celebración do festival para establecer todas as cuestións de organización, solucionar dúbidas e repartir as identificacións necesarias. Os gastos de transporte e hospedaxe, de ser o caso, serán de conta das persoas voluntarias.
O programa SON Voluntario/a está destinado aos festivais de música de Galicia nos que as mozas e mozos participantes realizarán diferentes tarefas e vivirán a experiencia do festival desde dentro, creando así unha comunidade voluntaria en cada evento.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.