Máis de 700 persoas participan esta fin de semana no programa da deputación “En ruta coa Depo”

A Deputación de Pontevedra organiza esta fin de semana a través do programa “En ruta coa Depo” nove novas excursións nas que participarán máis de 700 persoas de nove concellos da provincia de Pontevedra. En concreto, trátase de 756 veciñas e veciños de Mos, Pontevedra, Catoira, Redondela, Poio, Vila de Cruces, Gondomar, Cambados e Vilagarcía que percorrerán distintos enclaves das comarcas de Pontevedra, Tabeirós-Terra de Montes, O Salnés e O Condado, así como as illas Cíes e San Simón.

Máis polo miúdo, este sábado 31 de agosto terán lugar tres dos itinerarios. O primeiro levará 108 persoas da asociación do Centro Recreativo e Cultural de Torroso (Mos) á ruta pola illa de San Simón, o castelo de Soutomaior, Ponte Sampaio e o Museo Meirande de Redondela, mentres que a segunda achegará outras 108 persoas da Asociación de Maiores de Mondariz ao itinerario por Forcarei, con visitas ao mosteiro de Aciveiro neste concello e ao castro de Toiriz, o mosteiro de San Lourenzo de Carboeiro e a fervenza do río Toxa no de Silleda. Por outra banda, 108 persoas da Asociación de Amas de Casa Muíños do Vento, de Catoira, farán a ruta de Mondariz-Balneario, con paradas no castelo de Sobroso neste concello e no castro de Troña en Ponteareas.

Para o domingo 1 de setembro están programadas as restantes seis rutas. Así, 108 persoas da Asociación de Nais e Pais de Alumnos Os Muíños, de Redondela, farán a ruta marítima con pícnic polas illas Cíes, previa visita ao barrio mariñeiro do Berbés, en Vigo. Por outra banda, 108 persoas da asociación Mulleres en Igualdade, de Poio, farán a ruta por Forcarei, mentres que 54 persoas da Asociación de Mulleres Rurais de Loño (Vila de Cruces) farán o itinerario de Cambados, que inclúe visitas ao conxunto histórico da localidade, ao Museo Etnográfico e do Viño, ás ruínas de Santa Mariña Dozo, á adega do pazo de Fefiñáns e ao Museo Muíño de Mareas da Seca.

Tamén nesta xornada, 54 persoas da Asociación Cultural San Vicente de Mañufe, de Gondomar, realizarán a ruta temática “Camelias señoriais e Ruta das Maceiras”, na que visitarán o pazo de Lourizán e o de Gandarón, en Pontevedra, e o Pazo de Oca e a Ruta das Maceiras de Callobre, na Estrada.

Os outros dous colectivos participantes de “En ruta coa Depo” este domingo 1 de setembro serán a Asociación Obradoiro Volandeira, de Cambados, e a Asociación Mulleres Rurais Anduriña de Sobradelo, de Vilagarcía. No primeiro caso, 54 persoas desta asociación farán o itinerario da Guarda, con visita ao castro de Santa Trega neste concello e ao conxunto histórico, o monte Aloia e o Alto dos Cubos no concello de Tui.

A través do programa “En ruta coa Depo”, a Deputación pretende crear espazos de unión e convivencia a través do impulso da igualdade de acceso aos recursos turísticos, especialmente para as persoas con diversidade funcional. O programa pretende tamén dar a coñecer os distintos lugares da provincia de Pontevedra, dotar as asociacións de recursos para promover o envellecemento activo e promover os recursos máis importantes das Rías Baixas para que a xente os coñeza, se poida sentir orgullosa deles, coide o medio ambiente e adquira novos valores de respecto ao contorno. Na edición deste ano, a institución provincial oferta 20.000 prazas e 32 rutas para gozar dun día de convivencia, con xantar e transporte incluídos, por lugares emblemáticos da provincia.