A Deputación de Pontevedra inaugurará este domingo a terceira edición das súas “DepoRutas BTT”. Concretamente, a estrea da nova edición do programa deportivo chegará no Concello de Meis, que acollerá unha proba cun percorrido de 41,29 quilómetros polos seus montes e cun desnivel positivo acumulado de 721 metros.
A DepoRuta BTT de Meis, que se iniciará ás 10.30 h, ten como punto de saída a praza de España da vila. A ruta dirixirase primeiro en dirección a San Salvador de Meis, onde comezarán os ascensos aos montes da Escusa, Arcos e Castrove. Nestas ascensións poderase gozar dunhas marabillosas vistas da ría de Arousa. Posteriormente, as e os participantes continuarán cara ao mosteiro de Armenteira e á subida ao curro da Escusa. Desde este punto poñerán rumbo á liña de chegada, situada no punto de inicio da proba.
Tras a cita de Meis, a seguinte DepoRuta BTT terá lugar o 15 de setembro en Silleda. Para esta proba haberá 300 prazas dispoñibles e o prazo de inscrición estará aberto a partir do luns 26 de agosto na web da Deputación de Pontevedra. Posteriormente, o 29 de setembro, terá lugar en Nigrán; o 20 de outubro, en Salceda de Caselas; e, por último, a derradeira ruta será o 27 de outubro en Cangas.
O programa “DepoRutas BTT” ofrece 5 rutas totalmente gratuítas cun máximo de 300 participantes en cada unha. O obxectivo da iniciativa da Deputación de Pontevedra é fomentar o deporte á vez que se poñen en valor os montes da provincia, coa súa riqueza natural, ecolóxica e patrimonial inigualable. O programa está dirixido a todas as persoas maiores de 16 anos que gocen do deporte en contacto coa natureza.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.