O Goberno de Carmela Silva aproba as bases para as prazas de “O teu primeiro emprego” na Deputación

Con este programa de fomento da empregabilidade a institución provincial contratará en prácticas a 33 mozos e mozas da provincia

O Goberno da Deputación de Pontevedra vén de aprobar as bases reguladoras do programa de fomento da empregabilidade na provincia de Pontevedra, “O teu primeiro emprego“, neste caso para a propia institución provincial. O programa substitúe ao antigo Plan de Práctica Laboral, que converte as bolsas en contratos en prácticas.

O obxectivo deste programa é facilitar que os titulados e tituladas universitarias e de ciclos superiores sen experiencia laboral previa poidan acceder a un primeiro emprego adecuado ao seu nivel de estudos cursados, adquirir experiencia profesional e facilitar a súa futura inserción no mercado laboral. No caso da institución provincial, ao abeiro deste Plan, ofertaranse 33 contratos en prácticas, 19 para graduados e graduadas e 14 para titulados e tituladas en ciclos superiores.

A selección das persoas candidatas farase entre demandantes de emprego, persoas desempregadas ou con cartón de mellora de emprego que estean inscritas no Servizo Público de Emprego e que cumpran cos requisitos do programa. Presentada a oferta de emprego levarase a cabo unha preselección das persoas candidatas, a un máximo de 5 por posto, que se remitirá ao Servizo de Recursos Humanos da Deputación, que nomeará a un tribunal cualificador para seleccionar ás beneficiarias destes contratos en prácticas. O proceso de selección basearase en criterios obxectivos a través dunha valoración dos méritos acreditados polas persoas seleccionadas polo Servizo Público de Emprego.

Máis polo miúdo, terase en conta o expediente académico, que contará ata un máximo de 4 puntos; o doutoramento relacionado co contido da bolsa, 2 puntos; os títulos de máster universitario oficial ou os títulos propios da Universidade relacionados co contido da bolsa, máximo 1 punto; posuír unha titulación académica oficial distinta e relacionada co posto de traballo a desempeñar, de nivel igual ou superior á esixida para a formalización do contrato en prácticas, 0,5 puntos por título ata un máximo de 1 punto, e a asistencia a cursos de especialización, formación e perfeccionamento organizados por centros oficiais dependentes da Administración do Estado, da comunidade autónoma ou Administración local, universidades, colexios oficiais ou escolas da Administración pública directamente relacionados co posto a desempeñar, ata un máximo de 2 puntos.

Este plan de fomento de empregabilidade estrutúrase en catro programas independentes que son: o teu primeiro emprego na Deputación de Pontevedra, o teu primeiro emprego nos concellos, nas empresas e corporacións sectoriais, e en organizacións sen ánimo de lucro. No caso das outras tres modalidades as bases reguladoras xa foron aprobadas en anteriores Xuntas de Goberno.

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.

SIGUENOS EN TELEGRAM