Pontevedra acollerá este mes de febreiro seis novos obradoiros do programa “SmartPeme”

O Edificio Administrativo da Deputación de Pontevedra, na capital provincial, acollerá seis novos obradoiros ao abeiro do programa “SmartPeme” da institución provincial. “SmartPeme” oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarios e empresarias e de mozos e mozas autónomas.

O primeiro curso que acollerá a oficina “SmartPeme” de Pontevedra en febreiro será “Emprego de vídeos nas redes sociais: Youtube, Periscope…”, o martes 6 de febreiro. Pola súa banda, dous días despois, o xoves día 8, impartirase “A túa páxina web en menos de 90 minutos”. A terceira quenda terá lugar unha semana despois, o xoves día 15, con “Google Analytics: Iniciación á analítica WEB”. Tras ela, a seguinte será o luns 19 de febreiro, cando celebrarase o curso “Grava e monta vídeos profesionais co teu Smartphone”. Para rematar a actividade deste mes de febreiro, o mércores 21 terá lugar o curso “Crea os teus propios informes: Google Data Studio” e o martes 27, “Aprende a promocionar a túa empresa con Pinterest.” A oficina “SmartPeme” de Pontevedra, no Edificio Administrativo da Deputación, atópase na Gran Vía de Montero Ríos, s/n e as inscricións pódense facer no número de teléfono 886 202 020, o correo electrónico info.smartpeme@depo.es ou a páxina web www.smartpeme.depo.gal.

Lembramos que o novo proxecto “SmartPeme“, en palabras da presidenta da Deputación, Carmela Silva, “é un novo modelo de servizo orientado á mellora competitiva das pemes e á procura dunha melloría nas vendas e na eficacia e eficiencia das tarefas, que abre novos campos de actuación e alcanza novos grupos de interese coma as e os emprendedores, as asociacións empresariais e as e os axentes de dinamización en concellos”. Para isto, nas oficinas de “SmartPeme” no Porriño, Cambados, Pontevedra, Lalín, Ponteareas e Vigo hai itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial das e dos asesores en función das necesidades da súa área de influencia, kits de asesoramento en novas tecnoloxías a emprendedores e emprendedoras, identificación e difusión das necesidades TIC aos provedores de solucións para as pemes e, tamén, impulso de novas carteiras de servizos de asesoramento.