A Deputación de Pontevedra leva a reflexión filosófica sobre a violencia machista a Lalín no marco de “Mulleres en acción.Violencia zero”

As reflexións sobre as violencias machistas dende unha perspectiva filosófica foron este mediodía as protagonistas da nova intervención artística do programa “Mulleres en Acción: Violencia Zero“, iniciativa impulsada por cuarto ano consecutivo pola Deputación de Pontevedra a través do Servizo de Igualdade. A actriz e creadora escénica Marta Pérez encargouse de desenvolver a peza “Sofía”, un diálogo filosófico sobre a violencia machista, que se desenvolveu no Vestíbulo do Concello de Lalín.

No acto participaron a deputada provincial Digna Rivas; o alcalde de Lalín Rafael Cuíña; profesorado e estudantes do IES Laxeiro; así como persoas da Asociación Morea e público en xeral. Na súa intervención, a deputada Digna Rivas apelou á necesidade, “hoxe máis que nunca, de tomar conciencia da problemática das violencias machistas”, e dirixíndose especialmente á rapazada, lembroulles que “vós, mozas e mozos, tedes que ser protagonistas na fin das violencias contra as mulleres”.

“Sofía” trátase dunha micro peza unipersoal feita ad hoc dun espectáculo maior chamado “Sofía e as Postocráticas”. Dende unha perspectiva filosófica, Marta Pérez puxo en escena unha intervención que versou sobre a violencia machista, empregando sobre todo ideas da filosofía grega para establecer que é e que non é violencia machista. A creadora protagonizou un diálogo no que reflexionou sobre casos como o da Manada, o silencio como resposta ou o chamado victim blaming (culpabilización da vítima). A artista mantivo un activo coloquio co alumnado do Laxeiro que estivo no acto, reflexionando sobre cuestións de igualdade e violencias machistas.

Este ano 2019 “Mulleres en Acción. Violencia Zero” volve reunir o traballo de 25 artistas especializadas en diferentes modalidades como son a pintura, a música, a danza, o teatro, a poesía, o graffiti ou a performance, vinculadas todas elas pola vontade de ofrecer na súa obra un firme discurso en favor da igualdade de xénero. Esta cuarta edición comezou en novembro de 2018 e novamente se celebra en 25 concellos da provincia (Vigo, Pontevedra, Ponteareas, Salceda de Caselas, Vilaboa, Mos, Ponte Caldelas, Cambados, Vilagarcía de Arousa, Barro, Lalín, O Grove, Silleda, Tomiño, Poio, As Neves, Illa de Arousa, Baiona, Cangas, A Guarda, Forcarei, Gondomar, Cuntis, Meis e Nigrán).