A Axencia Estatal de Meteoroloxía (AEMET) informa dun novo episodio adverso de nivel laranxa por vento, que deixará refachos de ata 100 KM/H en boa parte da Comunidade galega. Este episodio adverso comezará a sentirse a partir de media noite de hoxe e poderá prolongarse ata primeiras horas da tarde de mañá. O vento tamén será intenso no mar, especialmente no litoral da Coruña, onde acadará a forza 8 e haberá ondas de entre 5 e 6 metros.

Tamén poderán ser significativas as chuvias no oeste e suroeste da Coruña, así como nas Rías Baixas, na provincia de Pontevedra e o sur de Ourense. Pola contra, na montaña de Lugo e Ourense é posible que neve.

Así, a intensidade do vento nos obriga a tomar algunhas medidas de autoprotección, que indicamos deseguido, co fin de minimizar as situacións de risco. Deste xeito, desde o 112 Galicia lembramos a importancia de extremar as precaucións nas estradas. Por iso, recordámosche que:

• Evita os desprazamentos na medida das túas posibilidades e, en todo caso, antes de coller o coche, consulta aquí o estado das estradas
• Recorda que co vento o mobiliario urbano puido terse desprazado e os restos de árbores e pólas que puideron caer á vía poden condicionar a circulación
• Do mesmo xeito, consideramos importante non empregar vehículos lixeiros, como bicicletas ou ciclomotores
• Se tes que saír á rúa, afástate de edificios ruinosos, árbores, paneis publicitarios, estadas e obxectos que sexan susceptibles de desprazarse co vento
• Ademais, lembra retirar das fiestras, dos balcóns e dos tellados calquera obxecto que poida caer á rúa
• Por último, ante calquera emerxencia marca o 1-1-2

​Como dicíamos máis arriba, este fenómeno tamén se deixará sentir con intensidade na costa da Coruña, onde se prevé vento en mar que poderá acadar a forza…Así, reiteramos a necesidade de:

• Manterte afastado da liña de costa, isto é, diques, rompentes, paseos marítimos, praias, xa que unha onda podería arrastrarte
• Polo mesmo motivo, consideramos que, ante esta situación, sacar fotografías desde algún deses lugares pode poñerte en perigo
• Ademais, asegúrate de que a túa embarcación está ben amarrada
• Tampouco é o día para bañarse ou para a práctica de deportes acuáticos e/ou náuticos

​Igualmente, segundo as previsións meteorolóxicas da Axencia Estatal de Meteoroloxía, este fenómeno adverso virá acompañado de precipitacións, polo que, desde o 112 Galicia, recordamos:

• O efecto de arrastre das chuvias pode provocar o desprendemento de terra e pedras
• Tamén afástate de zonas susceptibles de sufrir inundacións, coma pontes, ríos, etc.
• Lembra non atravesar un lugar inundado
• Aparta ao arcén no caso de que as condicións climáticas resten visibilidade ou seguridade na vía

​Do mesmo xeito, aproveitamos para repasar as medidas de autoprotección no caso de que te atopes na casa e sufras unha inundación:

• Desconecta a electricidade e permanece nas zonas máis altas da casa
• Conduce aos animais a lugares altos e protexidos
• Ante calquera emerxencia, reiteramos marca o 1-1-2

Noticias Vigo

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.