Nós contra a violencia, a campaña posta en marcha este verán pola Xunta de Galicia, a través das secretarías xerais de Política Lingüística e da Igualdade, no marco do Pacto de Estado contra a Violencia de Xénero, cos obxectivos de dinamizar a lingua galega e sensibilizar contra este tipo de violencia, leva a Ribeira este sábado, 14 de setembro, a nova proposta Mai Mai, da man de Baobab Teatro baixo xestión de Culturactiva.
Así o anunciaron hoxe o secretario xeral de Política Lingüística, Valentín García, e o alcalde da localidade barbanzá, Manuel Ruiz, nunha rolda de prensa na que o representante da Consellería de Cultura e Turismo quixo destacar “que Mai Mai integra a perspectiva de xénero e que introduce elementos para a reflexión e para o traballo en prevención da violencia, para alén de ofrecer unha alta calidade escénica e de traballo actoral” e convidar “tanto ás familias de Ribeira e do Barbanza coma ás do resto de Galicia a participaren nas funcións da xira que está a desenvolver Baobab Teatro polas catro provincias, da man do programa Nós contra a violencia”.
Acompañáronos na rolda de prensa a actriz Andrea Bayer, responsable de Baobab Teatro e protagonista do espectáculo, e a segunda tenente de alcalde, Ana Isabel Ruiz Reiriz.
‘Mai Mai’, en oito concellos da Rede de Dinamización Lingüística
Mai Mai é un espectáculo de Baobab Teatro dirixido a nenos de máis de 5 anos e ás súas familias. Nel, coa delicadeza e tenrura que caracterizan as producións desta compañía teatral, trátanse temas como a igualdade, o apoderamento da muller e a prevención da violencia de xénero, alén doutros como a concienciación ecolóxica.
No marco da campaña Nós contra a violencia, Mai Mai chegará este outono a oito concellos da Rede de Dinamización Lingüística (RDL): Cedeira, Lalín, Ribeira, A Rúa, Ponteareas, Arteixo, Ribadavia e Muros.
Esta fin de semana, a proposta chega ao concello coruñés de Ribeira (cunha función o sábado 14, ás 19,30 horas, no Auditorio Municipal) e ao ourensán da Rúa (con outra función o domingo 15, ás 18,00 horas no Centro Cultural Avenida). A entrada á actividade é libre e de balde ata completar a capacidade das salas.
Toda a información e calendario completo poden consultarse no Portal da Lingua Galega www.lingua.gal e na Axenda de Cultura de Galicia.
Dinamizar a lingua e sensibilizar contra a violencia
Ademais da actividade Mai Mai, o programa Nós contra a violencia ofrece numerosas propostas escénicas e materiais para traballar en dinamización lingüística e sensibilizar conta a violencia de xénero. Entre elas, inclúese tamén o espectáculo O rueiro das liortas, da compañía do Elefante Elegante, unha proposta que afonda no papel das mulleres nas relacións de parella e que botará a andar en concellos da RDL no mes de novembro.
Dentro das propostas musicais, a campaña ofrece o espectáculo A Roda da igualdade: ela e eles, así como obradoiros para pais e nais no marco do proxecto Igual-Son, con música, danza e contacontos, guías educativas sobre prevención da violencia de xénero na mocidade e outros materiais educativos centrados nos riscos e potencialidades das redes sociais e un manual práctico de ferramentas educativas para prever a violencia contra as mulleres, entre outras iniciativas que se irán dando a coñecer nas vindeiras semanas. Máis información no Portal da Lingua Galega.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.