A Deputación de Pontevedra incrementa nun 35% a súa marca provincial de deporte “Depodan” e “Depopromesa”

Ata 259 deportistas de 33 modalidades diferentes xa teñen recoñecida a marca coa que poderán optar ás bolsas cuxo prazo se abrirá ao remate do Estado de Alarma
Publicado por o día 30/04/2020 na sección de Deputación de Pontevedra

A Deputación de Pontevedra incrementa nun 35% a súa marca provincial de deporte “Depodan” e “Depopromesa”

A Deputación de Pontevedra vén de publicar no BOPPO a relación de deportistas da provincia que obteñen o recoñecemento das marcas provinciais de deportista de alto nivel (DEPO-DAN) e deportista promesa (DEPO-PROMESA). En total son 259 os e as deportistas que entran este ano no programa da institución provincial, o que supón un incremento do 35% respecto ao ano pasado.

Este recoñecemento permite optar ás bolsas que lles permitirán adestrar e preparar os seus obxectivos deportivos coa maior tranquilidade e coa maior dedicación posible. Para a concesión terase en conta a xustificación dos resultados acadados nos anos 2018 e 2019 (o campionato que se certifique será o ultimo levado a cabo pola federación correspondente, posto que nalgunhas modalidades algunhas probas lévanse a cabo cada 2 anos). A previsión da Deputación é abrir este prazo en canto remate o Estado de Alarma motivado pola crise sanitaria da Covid-19.

Novamente, entre os e as deportistas da provincia que participan no programa da Deputación hai figuras recoñecidas internacionalmente, caso de Támara Echegoyen, medallista olímpica en vela; Rodrigo Conde, quinto do mundo en Remo; Pablo Dapena, subcampión do mundo de tríatlon de longa distancia; Teresa Portela, medallista de bronce en K1-200 metros no Mundial de Piragüismo 2019; Nico Rodríguez, regatista subcampión do mundo e de Europa na clase 470, ou Susana Rodríguez Gacio, campioa do mundo de paratríatlon.

En canto aos deportistas Depo-DAN, neste 2020 son 172 os que obtiveron a marca provincial, 113 mantéñense respecto da lista do ano pasado e 59 son as novidades. Nesta categoría están representados 31 deportes: Atletismo (11), Automobilismo (1), Bádminton (1), Billar (1), Boxeo (1), Agility (1), Ciclismo (5), Deportes de Inverno (2), Esgrima (2), Judo (7), Karate (2), Kickboxing (1), Loita (9), Montañismo (1), Motociclismo (2), Natación (3), Orientación (1), Patinaxe (1), Piragüismo (63), Remo (4), Salvamento (1), Squash (1), Surf (1), Taekwondo (17), Tenis (2), Tiro con Arco (2), Tiro Olímpico (2), Tríatlon (5), Vela (18), Ximnasia (3) e Deporte Adaptado (1).

No caso da marca Depo-Promesa a lista está composta por 87 deportistas de 18 modalidades deportivas. Así, os datos desglosados son os seguintes: Bádminton (9), Boxeo (1), Esgrima (1), Hípica (1), Judo (4), Kárate (4), Kickboxing (9), Loita (3), Montañismo (1), Natación (2), Orientación (1), Patinaxe (1), Piragüismo (25), Salvamento (2), Taekwondo (10), Vela (3), Xadrez (3) e Ximnasia (7).