A presidenta da Deputación, Carmela Silva, presidirá este xoves a Gala do Deporte de Elite da institución na que se lles renderá homenaxe ás novas promesas e aos deportistas de alto nivel  da provincia de Pontevedra. O acto de recoñecemento, que terá lugar mañá ás 20.00 horas na escalinata exterior do Pazo provincial, será conducido por Terio Carrera e Begoña Fernández e contará con personalidades históricas do deporte provincial, actuacións musicais e audiovisuais.

A gala servirá para recoñecer o esforzo de 112 deportistas que teñen recoñecida a categoría DepoDan e das e dos 71 que acadaron o recoñecemento de DepoPromesa en función dos resultados deportivos dos anos 2017 e 2018. A través destes recoñecementos, contarán coa colaboración da Deputación en forma de bolsas que contribuirán á súa participación en competicións internacionais e nacionais no 2019 para seguiren, deste xeito, sumando logros deportivos.

O xornalista Terio Carrera e unha das xogadoras máis importantes de balonmán, a viguesa Begoña Fernández, que foi capitana da selección española, serán quen se encarguen de recibir as persoas asistentes e darlles a benvida e de conducir o evento. Carrera e Fernández daranlles paso tamén ás diferentes pezas musicais a cargo do dúo Two in the Mirror (baixo e voz) e ao audiovisual.

Ademais, no transcorrer da gala haberá espazo para lles conceder protagonismo a aqueles e aquelas que tanto lle deron á provincia coa súa traxectoria deportiva, neste caso, dúas personalidades históricas do deporte: Álvaro Pino e Cristina Fernández. Así, Pino, exciclista, gañador da Vuelta Ciclista a España, e Fernández, exárbitra internacional e actual responsable da arbitraxe feminina do Comité Técnico de Árbitros/as da Real Federación Española de Balonmano, darán conta das súas propias vivencias ao longo das súas respectivas carreiras deportivas.