A Policía Autonómica tramitou 64 denuncias nos controis de medidas ante a covid-19 en Galicia

Leváronse a cabo 112 dispositivos con 597 persoas identificadas no marco do plan de actuacións específicas destinadas a evitar a propagación da covid-19
Publicado por o día 01/02/2021 na sección de Galicia,Sucesos

A Policía Autonómica tramitou 64 denuncias nos controis de medidas ante a covid-19 en Galicia

Axentes da Policía Autonómica levaron a cabo a pasada fin de semana un total de 112 dispositivos en 35 concellos galegos nos que foron tramitados 64 denuncias. Os controis realizáronse no marco do plan de actuacións específicas destinadas á prevención, inspección e control do cumprimento das medidas adoptadas polas autoridades competentes pola covid-19, e saldáronse con 597 persoas identificadas.

Entre o 29 e o 31 de xaneiro, os axentes realizaron na provincia da Coruña 31 dispositivos nos concellos de Ames, Arteixo, Arzúa, A Coruña, Culleredo, A Laracha, Melide, O Pino, Porto do Son, Rianxo e Santiago de Compostela, cun total de 22 denuncias e 25 identificacións.

Na provincia de Lugo tramitáronse 8 denuncias e identificáronse 38 persoas en 14 dispositivos levados a cabo nos concellos de Lugo, Monterroso, Ribadeo, Sarria e Vilalba.

En canto aos controis levados a cabo pola Policía Autonómica na provincia de Ourense, realizáronse 33 dispositivos que deron como resultado un total de 340 identificacións e 16 denuncias en Allariz, O Carballiño, Leiro, Ourense, Ribadavia, San Cibrao das Viñas, San Cristovo de Cea e Verín.

E na provincia de Pontevedra, nos 34 dispositivos realizados en Lalín, Marín, Meaño, Meis, Poio, Ponte Caldelas, Pontevedra, Redondela, Sanxenxo, Vigo e Vilaboa rexistráronse 18 denuncias e identificouse a 194 persoas.

Durante os operativos, os axentes controlaron que nos establecementos abertos ao público se estaban a cumprir as medidas aprobadas polas autoridades sanitarias para facer fronte á covid-19, como o uso obrigatorio de máscara, o cumprimento da distancia de seguridade, o aforo e horario de peche dos locais e a prevención do botellón.

Estes dispositivos enmarcase no seo da colaboración entre as forzas e corpos de seguridade, cada unha no marco das súas competencias.

Comentar noticia

Your email address will not be published.