A alimentación implica a todo o mundo, a maiores e a pequenos, ao medio ambiente e á cadea de produción. Nos comedores escolares, o aspecto alimenticio vólvese máis relevante, xa que, máis aló da inxesta de alimentos, tamén é unha contorna idónea para ensinar bos hábitos dende as idades máis temperás. Neste sentido, implementar eco-comedores nas escolas, lugares onde prime a calidade e a orixe dos alimentos, resulta importante cara á procura dunha boa saúde dos cativos e cativas. Ademais, tamén pode servir para lograr unha sociedade que se comprometa cara á consecución dun desenvolvemento sostible e sustentable.

Neste contexto, a Universidade de Vigo oferta, por primeira vez dentro dos cursos de extensión universitaria de verán, o obradoiro Comedores escolares ecolóxicos: avanzando cara unha economía circular nas Reservas de Biosfera. O curso, que mañá pecha o seu prazo de preinscrición, desenvolverase no salón de plenos do Concello de Allariz entre o 1 e o 5 de xullo. O director do obradoiro, Xavier Simón Fernández, profesor na Facultade de Ciencias Económicas e Empresariais, fai fincapé en que a intención do curso é achegar aos asistentes “diversidade de experiencias e a presentación dos casos máis innovadores no ámbito do Estado”. Trátase dunha actividade especialmente destinada as asociacións de pais e nais, produtores ecolóxicos, responsables políticos e xestores de reservas da biosfera,  principais implicados e responsables, en última instancia, de implementar medidas que vaian en favor do desenvolvemento dun compromiso a prol da sustentabilidade nos comedores escolares.

O comedor como ferramenta educativa e a importancia da biosfera

Entre as correntes que se están a desenvolver sobre prácticas alimenticias, se persegue, cada vez máis, unha alimentación sa, equilibrada, ecolóxica e sostible. Neste sentido,“aprender a consumir produtos alimenticios orgánicos e de proximidade significa apostar por outro modelo de produción, un modelo que respecta o medio ambiente, un modelo  onde as persoas son importantes, un modelo onde a calidade e non a cantidade son condutores das decisións”, salienta o director do curso.

En Galicia xa se están a implantar iniciativas a favor de empregar o comedor escolar como ferramenta educativa, levando aos manteis e aos fogóns prácticas de consumo responsable e ecolóxico. “A escola municipal A Caracola , na Coruña é un exemplo. Con propostas que avanzan nesa dirección tamén hai que destacar o proxecto de comedores escolares de Ames, tamén na Coruña”, resalta Simón. Estas iniciativas xorden para que os nenos e nenas aprendan non só a comer, senón tamén a desenvolver prácticas de consumo sostible e respectuoso co planeta.

Os comedores escolares ecolóxicos apostan por ofrecer un menú equilibrado, libre de fritos, procesados, envasados e enlatados, así como por abolir produtos de gama baixa e apostar por aqueles que sexan de tempada e de consumo próximo. Neste sentido, “as reservas da biosfera, e especialmente a reserva da biosfera Mariñas Coruñesas e Terras do Mandeo, están a desenvolver plans alimentarios comarcais que traballan a prol do local e do orgánico. O proxecto desta reserva inclúe un código de boas prácticas que posúe unha etiqueta específica, o que beneficia aos produtores e consumidores, entre eles os comedores escolares”, subliña Simón.

Experiencias prácticas e innovadoras para o fomento dos eco-comedores

De cara a implementación de comedores escolares sostibles e respectuosos coa contorna, o obradoiro centrárase en distintos aspectos como dar visibilidade ao impacto da compra de alimentos de proximidade nas economías locais, coñecer as claves dos eco-comedores escolares, o balanceado de menús, manexo de alimentos e seguridade alimentaria, novas tendencias en modelos nutricionais para os comedores escolares e o futuro da alimentación nos colexios en Galicia.

O alumnado que asista a este obradoiro terá a a oportunidade de achegarse a proxectos que están en marcha en España e Galicia, ao tempo que traballan en grupo sobre aspectos específicos acerca das distintas formas de implementar os eco-comedores nas escolas. O curso completarase con visitas guiadas a diferentes experiencias para que as e os asistentes poidan observar, de primeira man, o funcionamento deste tipo de propostas.

Noticias Vigo

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.