“A UE pretende legalizar a ocupación do Sáhara occidental a través de acordos económicos con Marrocos”

As Comisións de Agricultura e de Pesca do Parlamento abordaron hoxe os acordos comerciais suspendidos xudicialmente por incluír ao Sáhara
Por o 10/10/2018 | Sección: AGE,Política
“A UE pretende legalizar a ocupación do Sáhara occidental a través de acordos económicos con Marrocos”

O 10 de decembro de 2015 unha sentenza histórica do Tribunal de Xustiza da UE anulou o tratado de libre comercio da UE con Marrocos por violar os dereitos do pobo saharauí. Nela o  TXUE especificaba que o Sáhara Occidental non forma parte de Marrocos, polo que se a UE permite a importación de produtos obtidos dun terceiro país violando os dereitos fundamentais -é dicir, un territorio baixo ocupación- estaría incentivando indirectamente esas violacións de dereitos. A principios do 2018, unha nova sentenza do TXUE estableceu que o Acordo de Pesca asinado en 2006 entre a Unión Europea e Marrocos non é aplicable ao Sáhara Occidental.

Ante este pinchazo da arquitectura legal na que se arroupan as súas relacións comerciais, a Unión Europea está manobrando para poder presentar novos acordos económicos a través dos cales aproveitarse dos recursos naturais do pobo saharauí sen renunciar a ter como socio a unha potencia ocupante, como é o Reino de Marrocos.

No marco deste contexto, e ao fío dos movementos que se veñen dando nos últimos meses de cara a tentar pechar estes acordos antes de que finalice a lexislatura, as relacións comerciais entre a UE e Marrocos foron abordadas hoxe por partida dobre no Parlamento Europeo: na sesión da mañá da Comisión de Agricultura e Desenvolvemento Rural -onde o representante da Comisión Europea xustificou o avance das negociación en base á realización dunha suposta consulta á poboación, sen entrar en máis detalles-  e na sesión de tarde da Comisión de Pesca.

Lídia Senra, coordinadora do Grupo Confederal da Esquerda Unitaria Europea/Esquerda Verde Nórdica (GUE/NGL) na Comisión de Agricultura e membro suplente na de Pesca -e que en outubro de 2017 formou parte da delegación de eurodeputadas/os expulsados do Sáhara Occidental ocupado-, tomou a palabra en ámbalas dúas comisións para amosar a súa fonda crítica co proceder do ente comunitario.

 “No ano 2015 unha sentencia xudicial anulou o acordo comercial UE-Marrocos. No 2016 un novo fallo delimitou que os produtos do Sáhara Occidental deberían quedar fóra salvo consentimento explícito do pobo saharauí. Agora a UE pretende retorcer esta condición argumentando a realización dunha suposta consulta. Pero “consulta” non significa “consentimento”, ao igual que consultar á “poboación” non significa consultar ao “pobo” saharaui. O consentimento teríao que dar en todo caso o pobo saharaui a través do seu lexítimo representante recoñecido internacionalmente, é dicir, a Fronte Polisaria”.

 Na sesión de tarde da Comisión de Pesca a eurodeputada Lídia Senra preguntou directamente sobre este aspecto ao representante da Fronte Polisaria, quen respostou que esa consulta realizouse “con Marrocos e o entorno do Goberno de Marrocos (…) A Comisión ignorou á Fronte Polisaria (…) e falan de poboación, non do pobo saharaui”, polo tanto non consultou ao lexítimo representante do pobo saharaui, nin respectou os marcos estipulados polas sentenzas do TXUE.

 Ante esta realidade a eurodeputada galega cualifica de “chapuza” a consulta realizada pola UE para pretender dotar de validez un acordo ilegal segundo o dereito internacional. Esta posición foi reafirmada por 89 organizacións e a propia Fronte Polisaria, que no mes de febreiro deste ano fixeron pública unha carta na que desmontan a versión da Comisión Europea afirmando que “ao 83% dos grupos que, segundo a Comisión da UE, participaron nunha ‘consulta’ relacionada co comercio do Sahara Occidental nunca se lles pediu participar, ou non participaron, en ningún proceso de consulta”.

Senra tamén criticou o cinismo retorcido do que fai gala a UE cando argumenta que non comercializar con produtos saharauis -vía explotación destes recursos controlada podo Goberno de Marrocos- supón unha perda económica para o pobo saharaui. “Como beneficia o acordo de pesca ás máis de 173.000 saharauis refuxiadas e refuxiados nos campos de Tindouf que dependen das axudas internacionais? Estes milleiros de persoas foron consultadas?”

Fronte ás manobras do Goberno de Marrocos e da UE para eludir cumprir as sentenzas do TXUE, a eurodeputada galega pide á UE que cese na súa actitude parcial e que respecte escrupulosamente o Artigo 73 da Carta da Organización das Nacións Unidas sobre os Territorios Non Autónomos, como é neste caso o Sáhara Occidental ocupado por Marrocos. Insta ademais ás potencias europeas a “adoptar dunha vez por todas unha posición coherente cos valores que di defender, respectando as sentenzas do Tribunal de Xustiza da UE e facer todo o posíbel para que a ONU e a comunidade internacional en sentido amplo se comprometa a cumplir ca realización do referendo de autodeterminación”.

Noticias de última hora en Vigo

Una respuesta para "“A UE pretende legalizar a ocupación do Sáhara occidental a través de acordos económicos con Marrocos”"

  1. Gamela   12/10/2018 at 10:07

    É vergoñento que tódolos veráns a prensa destaque as vacacións dos nenos e nenas saharauis en España mentras lles roubamos o seu futuro vía “acordos ilegais” coa potencia ocupante…

    O Reino de España é responsable directo desta inxustiza que sofren os refuxiados saharauis dende hai 43 anos !!!

    Responder

Comentar noticia

Your email address will not be published.