A Xunta convoca o 15 de abril os titulares dos terreos afectados polas obras de mellora de seguridade na estrada PO-552, no Concello de Vigo, para o levantamento de actas previas

Esta intervención, cun orzamento de máis dun millón de euros, ten por obxecto mellorar a seguridade nun treito de 4,5 km, entre a intersección coas estradas de Matamá e Muíños e á entrada de San Miguel de Oia, no municipio olívico
Publicado por o día 25/03/2019 na sección de Galicia,Vigo,Xunta de Galicia

A Xunta convoca o 15 de abril os titulares dos terreos afectados polas obras de mellora de seguridade na estrada PO-552, no Concello de Vigo, para o levantamento de actas previas

A Consellería de Infraestruturas e Mobilidade convoca o 15 de abril os titulares dos terreos afectados polas obras de mellora de seguridade na estrada PO-552, no Concello de Vigo, para o levantamento de actas previas.

Os propietarios das fincas deberán acudir o citado día ao Concello de Vigo, entre as 9.30 e as 13.00 horas. No seguinte enlace ao DOG pódese ampliar a información relativa a esta resolución: https://goo.gl/uzAGDA

Esta intervención, cun orzamento de máis dun millón de euros, ten por obxecto mellorar a seguridade viaria nun treito de 4,5 km da estrada autonómica PO-552, entre a intersección coas estradas de Matamá e Muíños e á entrada de San Miguel de Oia, no municipio olívico.

As obras previstas comprenden a transformación da intersección coas estradas a Matamá e Muíños, situada no punto quilométrico 1+100 da marxe dereita, executando unha glorieta. Tamén se converterá noutra rotonda a intersección co camiño de Romeu, situada no punto quilométrico 1+780,que comunica coa PO-325.

As tarefas inclúen a reordenación da intersección de baixada á Gándara, no punto quilométrico 2+100, na que se restrinxirán os xiros, que poderán realizarse na nova glorieta do punto quilométrico 1+770 e na existente no 2+300.

Tamén se executará unha nova glorieta no punto quilométrico 3+060, que permitirá restrinxir o de entrada á rúa Manuel Lago, e outra no punto quilométrico 5+100 para moderar a velocidade e facilitar os cambios de sentido en condicións de seguridade.

Intervirase en pequenos tramos de beirarrúas, complementarios á mellora das interseccións, reforzarase a sinalización dos pasos de peóns do tramo, e limitarase o aparcadoiro nos 10 m anteriores para facilitar a súa percepción, e melloraranse as paradas de autobús.

Esta iniciativa está enmarcada na estratexia da Consellería de Infraestruturas e Mobilidade para ter eliminados en 2020 todos os treitos de concentración de accidentes nas estradas autonómicas.

Comentar noticia

Your email address will not be published.