Lídia Senra: “A extrema dereita é un perigo, ataca os dereitos das persoas co máis duro do neoliberalismo”

A eurodeputada advirte da delicada situación que se está a vivir en toda Europa co auxe de forzas neofascistas e chama a debater sobre como frealas
Publicado por o día 18/03/2019 na sección de AGE,Política

Lídia Senra: “A extrema dereita é un perigo, ataca os dereitos das persoas co máis duro do neoliberalismo”

Estamos ante unha situación delicada. A extrema dereita é un perigo, porque ataca os dereitos de todas as persoas, aplicando nos gobernos nos que están entrando, os programas máis duros do neoliberalismo. Por esta razón, desde a esquerda e os colectivos sociais debemos debater sobre cales son as causas do auxe do neofascismo e das forzas de extrema dereita que se está está dando en toda Europa, analizar que podemos facer para frear estas forzas autoritarias e impedir que cheguen a gobernar, no contexto de toda a UE e tamén a nivel mundial, porque van contra a inmensa maioría da sociedade, do campesiñado, das mulleres, dos traballadores e traballadoras, atacan os dereitos humanos, atacan a democracia en si mesma”. Así o advertiu o pasado venres a eurodeputada Lídia Senra, membro do Grupo Confederal da Esquerda Unitaria Europea/Esquerda Verde Nórdica, e candidata de En Marea ás eleccións europeas de finais de maio, durante a rolda de prensa ofrecida na Coruña con motivo das xornadas O auxe do neofascismo e da extrema dereita en Europa. Perda de dereitos e liberdades, que se celebrarán esta tarde e mañá sábado durante todo o día no Paraninfo da Universidade herculina.

Senra explicou que o seu grupo se decidiu a organizar estas xornadas, en colaboración coa Comisión pola Recuperación da Memoria Histórica da Coruña (CRMH) e a Universidade da Coruña, porque “estamos moi preocupadas polo auxe da extrema dereita na UE e a nivel mundial, que poñen en cuestión os dereitos e as liberdades”. Para a europarlamentaria, auxe da extrema dereita ten que ver cos intereses que ten agora o capitalismo. Para seguir nese proceso de acumulación de riqueza en poucas mans, o capitalismo necesita gobernos de extrema dereita que sigan dándolle pulo ás reformas neoliberais, privando de dereitos ás persoas, negando incluso os dereitos medioambientais, como acabamos de ver agora do Goberno de EEUU, que nega o cambio climático, por exemplo.

Por iso, a eurodeputada considera fundamental que a esquerda sexa capaz de transmitir á sociedade o que hai detrás destes partidos e dos seus programas. Só así conseguiremos paralos. “Non creo que ninguén queira volver á situacións pasadas nas que se prohibía falar e escribirgalego. Non creo que ninguén queira volver á situacións pasadas nas que reunirse na rúa máis de tres persoas estaba prohibido. Hai que dar a batalla, ver o que hai detrás dos programas das forzas da extrema dereita e combatelos”, dixo, para cualificar tamén de grave o ataque directo que están a facer ás mulleres, poñendo en perigo a lei de violencia machista, por exemplo, como reivindicación no proceso de negociación do goberno andaluz.

Para Lídia Senra, a UE difúndese sobre os valores de defensa dos dereitos humanos, sempre se erixe na gran defensora e gardiana da democracia, constituiuse para que non se volveran a dar situacións fascistas pasadas. “E resulta que o presidente do Parlamento Europeo fai esta semana unhas declaracións valorando a Mussolini. Tajani debe dimitir como presidente do Parlamento Europeo xa. Isto non se pode consentir. É unha xustificación intolerable do fascismo no Parlamento Europeo”, defende a eurodeputada.

Fronte a estas situacións, Senra tamén avogou por facer algo de autocrítica e analizar o que a esquerda non está facendo ben e se traduce en que as nosas mensaxes non cheguan ao electorado e á sociedade en xeral. “Temos que ver como podemos ser eficaces para ser quen de elaborar e transmitir as nosas propostas mellor, porque a realidade non é que a dereita suba, senón que se rexistra a abstención da esquerda”, zanxou.

Pola súa banda, a avogada do Sindicato Andaluz de Traballadores/as, Pastora Filigrana, dixo compartir esta análise. “A esquerda ten que pararse a pensar en por que moita xente non se sinte identificada e queda na casa en lugar de votar. Debemos analizar por que a esquerda non capta o descontento da xente”, dixo. Filigrana cualificou como moi pertinentes estas xornadas para pensar en común. “neofascismo está presente actualmente en 18 parlamentos europeos, rexionais ou estatais, un é o de Andalucía e é posible que esta representación aumente. Urxe entender os porqués, o que está ocorrendo, que papel xoga o neoliberalismo”, dixo.

As xornadas comezarán este venres pola tarde ás 17:00 horas, coa apertura das mesmas a cargo da propia eurodeputada Lídia Senra; deFernando Souto Suárez, presidente da Comisión pola Recuperación da Memoria Histórica da Coruña; e de Julio E. Abalde Alonso, reitor da Universidade da Coruña. Xa ás 17:30 horas, terá lugar o primeiro dos coloquios, no que se tratará de facer un ‘Retrato da extrema dereita en Europa’. Nel intervirán ademais de Pastora Filigrana, Gabriele Michalitschinvestigadora en Economía Política, Teorías Políticas e Economías Feministas no Departamento de Ciencias Políticas da Universidade de Viena; e Sophia Siddiqui, membro do Institute of Race Relations (Reino Unido). Tras o debate, e para finalizar a xornada dese primeiro día, está programado a partir das 20:30 horas, un concerto acústico de Satxa e Samu Acaracán.

Urxe facerlle fronte á extrema dereita

Non creo que ninguén queira volver á situacións pasadas nas que se prohibía falar e escribir galego. Non creo que ninguén queira volver á situacións pasadas nas que reunirse na rúa máis de tres persoas estaba prohibido. Hai que dar a batalla, ver o que hai detrás dos programas das forzas da extrema dereita e neofascitas, e combatelas. A esquerda temos que reaccionar xa. Vídeo resumo da rolda de prensa desta mañá na Reitoría da Universidade da Coruña, como previa á xornada #StopNeofascismo que comeza esta tarde con Fernando Souto Suárez da Comisión Recuperación Memoria Histórica da Coruña, Pastori Filigrana do Sindicato Andaluz de Trabajadores/as (SAT), Sophia Siddiqui do Race Relations Institute e Gabriele Michalistch da Universidade de Viena.

Publicada por Lídia Senra en Viernes, 15 de marzo de 2019

Comentar noticia

Your email address will not be published.