Publicado por 
O Primavera do Cine en Vigo, que celebra a súa oitava edición do 30 de abril ao 5 de maio, afrontará unha segunda xornada chea de curtametraxes e longametraxes galegas e lusófonas. Ademais, a súa tradicional gala inaugural terá lugar ás 21.00 no barrio do Calvario (Urzáiz, 162). Neste caso e, como novidade, será un evento ao aire libre e de balde onde arrincará a sección oficial de longametraxes coa proxección de No intenso agora.
Na inauguración, o certame concederá a mención honorífica a un dos grandes impulsores do audiovisual galego: Manolo González, que será homenaxeado pola súa incansable labor en favor do cinema e a historia audiovisual galega, polas súas labores didácticas sempre co fin de dar a coñecer o cine galego e polo apoio que ofrece ás novas xeracións.
Ademais na gala de presentación, e coincidindo co Día do Traballador, poderase ver a unha das obras mestras do cinema documental actual: No intenso agora, do brasileiro João Moreira Salles. Un documental que, a través de diferentes imaxes de arquivo falará dos eventos de maio do 68 en París, a Primavera de Praga e a Chinesa comunista de Mao.
A PROGRAMACIÓN
Previo a gala de inauguración, no Instituto Camões de Vigo proxectaranse diferentes curtas galegas e lusófonas. Así, o primeiro pase é ás 18.00 e estará composto por catro obras galegas, mentres que no segundo pase, ás 19.30, exhibiranse catro curtas lusófonas.
Deste xeito, todos os asistentes ao bloque 1 de curtas galegas poderán ver Mariñeiro de Juan Galiñanes, un falso documental protagonizado por Celso Bugallo que aborda as dificultades do traballo no mar e que recibiu a Mención Especial do Xurado na última edición do Ourense Filme Festival (OUFF); Plus ultra de Samuel M. Delgado e Helena Girón, unha peza de ficción experimental que fabula sobre a colonización; Beautiful Boy de Fran X. Rodríguez, unha historia sobre o consumismo que estivo nomeada a Mellor Curtametraxe na última edición dos Premios Mestre Mateo e De repente, la noche de Cristina Bodelón e Ignacio de Vicente, un drama familiar que narra a historia dun matrimonio e da súa loita para salvar a súa filla enferma.
Xa no segundo pase, o bloque 2 de curtas lusófonas estará composto por Equinócio de Ivo M. Ferreira, un drama sobre a perda da memoria; Primeiro Ato de Matheus Parizi, unha obra na que se verá como dous estudantes de teatro intentan convencer aos seus compañeiros de que se unan a eles para intentar desmantelar as políticas culturais de Brasil; Altas cidades de ossadas de João Salaviza, un relato sobre Karlon, o pioneiro do Cape Verde Creole Rap e estreado na Berlinale de 2017; ou Terrain Vague de Latifa Saïd, seleccionado en TISFF de Grecia en 2017 ou no Festival Internacional de Curtametraxes Vila do Conde que amosa a vida de Omar, un traballador do Magreb que se sente incómodo ante as mulleres e a súa relación con Rita, coa que tratará de superar os seus complexos.
Durante todas as xornadas de proxeccións no Camões, os asistentes poderán gozar duns petiscos doces e salgados cortesía do Instituto Camões e dun albariño Carallán, xentileza de Adegas Terrae, un dos patrocinadores do festival.
OS PREZOS
As entradas aos bloques de curtas galegas e lusófonas pódense adquirir no Instituto Camões desde media hora antes do comezo das proxeccións e cada un deles ten un custo de 3€. Toda a información sobre a sección oficial está na web do festival.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
