O IES de Mos acolle este martes a música e a danza de María Move no marco do programa “Mulleres en acción. Violencia zero”

Carmela Silva asistirá ao instituto para gozar de “In Mapa Son”, unha acción na que tamén tomarán partido unha trintena de estudantes do bacharelato de Artes
Publicado por o día 14/01/2019 na sección de Deputación de Pontevedra

O IES de Mos acolle este martes a música e a danza de María Move no marco do programa “Mulleres en acción. Violencia zero”

A presidenta da Deputación, Carmela Silva, xunto á alcaldesa de Mos, Nidia Arévalo, e a deputada de Igualdade, Isaura Abelairas, participará este martes 15 de xaneiro, ás 10:25 horas, na quinta intervención artística da cuarta edición do programa da Deputación de Pontevedra “Mulleres en acción. Violencia zero“. Á acción, que se desenvolverá no IES de Mos, tamén asistirá unha trintena de estudantes do bacharelato de Artes. Esta iniciativa, promovida pola institución provincial, ten por obxectivo darlle visibilidade á loita contra as violencias machistas, así como dar a coñecer o traballo de novas artistas que están a traballar a prol da igualdade.

A acción escénica, que se desenvolverá no IES de Mos, estará protagonizada pola artista compostelá María Move que, ante o alumnado levará a cabo a acción titulada In Mapa Son que estará composta por música en directo e unha coreografía de danza contemporánea. A artista, licenciada en Belas Artes e cunha ampla e recoñecida carreira musical, traballa actualmente como docente de Acción Formativa en centros como a Facultade de Ciencias da Educación de Pontevedra ou o CGAC, impartindo clase en materias relacionadas coa música e artes plásticas.

Este ano “Mulleres en acción. Violencia zero” volve reunir o traballo de 25 artistas especializadas en diferentes modalidades como son a pintura, a música, a danza, o teatro, a poesía, o graffiti ou a performance, vinculadas todas elas pola vontade de ofrecer na súa obra un firme discurso en favor da igualdade de xénero. Esta cuarta edición comezou en novembro de 2018 e novamente terá lugar en 25 concellos da provincia (Vigo, Pontevedra, Ponteareas, Salceda de Caselas, Vilaboa, Mos, Ponte Caldelas, Cambados, Vilagarcía de Arousa, Barro, Lalín, O Grove, Silleda, Tomiño, Poio, As Neves, A Illa de Arousa, Baiona, Cangas, A Guarda, Forcarei, Gondomar, Cuntis, Meis e Nigrán).