Esta semana celébranse dúas datas importantes para o noso planeta, o día Mundial do Medio Ambiente e o día dos Océanos. Dende Amigos da Terra, Recolte e a Mancomunidade de Concellos do Morrazo, a través da súa campaña conxunta Residuo Mínimo poñeremos o foco na problemática dos plásticos para o medio ambiente, os nosos mares e a nosa saúde.

Activistas de Amigos da Terra estarán esta semana en Cangas e Bueu (mércores 6) e Moaña (luns 11) diante de grandes supermercados nos que pretenden sensibilizar ás persoas consumidoras do sobreenvasado das súas compras, dos impactos de todos estes plásticos no medio ambiente e da existencia de moitas alternativas de moi fácil integración nas súas vidas, que axudarían a revertir a situación dun xeito moi notable.

• Mércores 6 Cangas (de 12:00 a 14:00): Praza do Eirado do Sinal (Eroski).
• Mércores 6 Bueu (de 17:00 a 19:00): Avenida Montero Ríos (Gadis).
• Luns 11 Moaña (de 12:00 a 14:00): Parque do Concello (Carrefour).

Baixo o lema “Plastic Attack”, motivarán á cidadanía a revisar as súas compras e deixar no posto informativo os plásticos innecesarios e as embalaxes supérfluas que atopan na súa compra, para visibilizar o exceso de plásticos que día a día consumimos e as alternativas reutilizables que como consumidores/as críticos/as podemos incorporar ás nosas rutinas para reducir os residuos que xeramos. Ademais, convidaremos mediante unha carta que entregaremos a supermercados e grandes empresas a sumarse á moda do Residuo Cero e a que ademáis de promover a reciclaxe nos seus establecementos, poñan a disposición da cidadanía cada vez máis produtos a granel e menos envases innecesarios e perxudiciais para as persoas e o medio ambiente.

A iniciativa forma parte do movemento denominado #DesnudaLaFruta, ao que nos sumamos e que busca que a cidadanía extenda este tipo de accións por toda a xeografía e denuncie a través de fotografías nas redes sociais o ridículo e grave que pode chegar a ser este sistema de envases supérfluos e dun so uso envasando, por exemplo froitas peladas en bandexa de poliexpan para a súa conservación (en lugar de deixar a proteción natural da froita).

Ademáis, en Galicia, de todos os plásticos que se poñen no mercado, nin sequera un 15% chega a ser reciclado, isto significa que acaban en vertedoiros, incineradoras e o que é peor, nos nosos montes, ríos e mares, despilfarrando así toneladas de recursos naturais precisas para fabricar elementos cunha vida útil de non máis de 10 minutos e con fácil sustitución.

Segundo o Programa Medioambiental de Nacions Unidas (UNEP), cada ano chegan ata 12 millons de toneladas destes residuos aos nosos mares, provocando danos moi graves á fauna mariña e intrioucíndose na cadea alimenticia a través dos microplásticos. Segundo as previsións, se a situación continúa como ata o de agora, no 2050 haberá máis plásticos que peixes no mar.

Para frear esta situación é imprescindible reducir drásticamente a produción de plásticos e eliminar todos aqueles que sexan dun so uso, tal e como ademáis obriga a Comisión Europea na nova Directiva de plásticos pendente de ser aprobada nas vindeiras semanas.

Noticias Vigo

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.