Publicado por 
Co curso académico 2018/2019 iniciándose, neste mes de setembro serán dous os cursos de extensión universitaria que se celebrarán no marco da programación do campus de Ourense. O primeiro deles, que terá lugar na Facultade de Ciencias da Educación, estará centrado no manexo da voz e a comunicación. O segundo, que se desenvolverá entre Allariz, Cuntis e A Estrada, achegará ás e aos asistentes as potencialidades do turismo de benestar baseado na cultura da produción tradicional do viño, da cervexa e da sidra.
Os cursos forman parte da programación de extensión universitaria de 2017/2018, composta por seis propostas de temáticas diversas abertas a matrícula de todas as persoas interesadas, membros ou non da comunidade universitaria. Con estas actividades preténdese tanto abrir as aulas universitarias á cidadanía como levar a universidade fóra do campus, celebrándose varios dos cursos en diferentes concellos das provincias de Ourense e Pontevedra.
Diferentes escenarios e prezos
A primeira das formacións que se desenvolverá este mes de setembro será o curso Educación da voz e do discurso. Pedagoxía para unha comunicación eficaz, dirixida por Santiago Pato e Tania Cid. Con 50 prazas dispoñibles, esta actividade terá lugar do 17 de setembro ao 5 de outubro e nela as persoas participantes terán a oportunidade de coñecer o aparato fonador, o seu coidado e a súa hixiene funcional e recursos para unha axeitada educación e uso da voz, ademais de mellorar a súa capacidade para facilitar a transmisión da mensaxe oral e a estruturación do discurso, entre outras cuestións. O seu custe oscila entre os 20 e os 30,75 euros segundo o colectivo de pertenza.
A esta proposta seguiralle o curso Turismo de benestar baseado na cultura da produción tradicional do viño, da cervexa e da sidra, dirixido por José Antonio Fraiz e Noelia Araújo. A iniciativa volverá a celebrar unha nova edición achegándose ao Concello de Allariz, ao balneario de Cuntis e á sidraría Lagar de Ribela, na Estrada, do 26 ao 28 de setembro. A temática do curso versa sobre a vinculación do turismo con sectores de produción artesanal en auxe na actualidade. Neste caso, o prezo vai dos 32,50 ata os 50 euros.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
