Susana del Río mostra o seu optimismo sobre a saída da crise “coa total implicación da Unión Europea que agora é moi conscente e está actuando”

A experta en políticas europeas protagonizou a participativa webinar que organizou a Deputación de Pontevedra para celebrar o Día de Europa
Publicado por o día 12/05/2020 na sección de Deputación de Pontevedra

Susana del Río mostra o seu optimismo sobre a saída da crise “coa total implicación da Unión Europea que agora é moi conscente e está actuando”

A importancia de contar cunha Europa solidaria, que aporte recursos a través dun plan estrutural para facer fronte ás consecuencias do Covid 19, e co optimismo e confianza na Unión Europea da que “dependemos para facer fronte a esta situación tan terrible” foron algunhas das conclusións da webinar “Que Europa necesitamos?”, impulsada pola Deputación de Pontevedra para celebrar o Día de Europa.

Na conferencia telemática, que presentou a presidenta provincial Carmela Silva e que seguiron máis dun centenar de persoas, a experta en asuntos europeos Susana del Río, mostrou o seu optimismo en que “a pesar das dificultades e dalgunhas respostas que puideron decepcionar nos primeiros días, a día de hoxe estou convencida de que no curto prazo, dende a Unión Europea, coordinados con coherencia e total transversalidade, imos ser moi capaces de saír desta situación e vencer xuntas e xuntos ao Covid 19”. Del Río foi máis aló ao asegurar que “sabemos que non haberá estigmas. A sinal do Eurogrupo foi moi forte de que todos somos Unión Europea, que todos somos necesarios e que non habería diferenzas entre o Norte e o Sur”.

A experta comunitaria dixo que na Unión son moi conscientes en que a súa actuación é fundamental. “É precisa unha democracia europea supranacional representativa, de calidade” e conducir a política desde a gobernanza multinivel, na que se fomente a participación “elixindo políticas concretas e facendo gran política, impulsando a transversalidade, a unión e integración dende o local e o máis próximo á cidadanía ao europeo, seguindo o principio de subsidiariedade para poder vertebrar e dar resposta ás demandas da nosa cidade, do noso país e do conxunto da Unión Europea”.

Pola súa banda, a presidenta provincial, Carmela Silva, coincidiu con Del Río en que “só o optimismo permite mudar o mundo”, e amosou a súa confianza na Unión Europea reivindicando a necesidade dunha Europa solidaria que aporte recursos para facer fronte á pandemia.  Tamén aproveitou Silva para recordar “vellos e novos retos que levan persoas expertas como Susana del Río demandando dende hai anos, como a necesidade dunha Europa solidaria, dixital, da investigación, da ciencia e do coñecemento; dunha Europa que aposte por reforzar a saúde, por políticas de inmigración comúns, por reforzar o euro e loitar contra o cambio climático cun gran pacto verde europeo”. Sobre todas estas cuestións Silva apostou por tomar “decisións intelixentes” elaboradas desde “a seriedade, o rigor, a análise e atendendo ao principio de subsidiariedade”.

Susana del Río tamén confirmou que a Unión europea “púxose xa en marcha e está a traballar de xeito conxunto, solidario, desde todos os niveis de actuación e decisión política para afrontar esta situación. Imos ser moi capaces de saír desta situación e de elevar a Unión Europea ao que verdadeiramente é”. Neste eido, Del Río incidiu ao igual que Silva na solidariedade e na importancia do traballo conxunto: “hai que deixar de lado os egoísmos nacionais e vertebrar unha resposta común, solidaria, construír máis integración europea para poder elevar os valores europeos”.  Deste xeito, e sobre a sanidade, a conferenciante destacou que debe estar presente “con acción e estratexia dende a Unión Europea, para que cando veña unha etapa tan difícil como esta esteamos preparadas e preparados e poidamos reaccionar antes”.

Con esta webinar, protagonizada por Susana del Río, a Deputación de Pontevedra puxo o broche de ouro aos actos de celebración do Día de Europa, que arrancaron a pasada fin de semana coa versión online do programa “Degusta Europa” así como cunha serie de vídeos elaborados por chefs galegos e galegas.

Comentar noticia

Your email address will not be published.