Talía Teatro abre a programación de 2019 no Teatro Municipal

Este venres ás 21.30h representará “O servidor de dous amos”
Publicado por o día 30/01/2019 na sección de Galicia,Tui

Talía Teatro abre a programación de 2019 no Teatro Municipal

Talía Teatro abre este venres, 1 de febreiro, ás 21.30h a programación do Teatro Municipal de Tui deste 2019 coa representación de “O servidor de dous amos”.

Dirixida por Diego Rey achéganos novas formas de teatralidade na revisión dun clásico de Carlos Goldoni. Esta proposta respecta o ritmo, a comedia e o humor da peza orixinal, ao tempo que persegue o “espectáculo total” nunha obra quen de abraiar ao público. O resultado é un retrato irreverente e desacarado da sociedade, tan morzar coma divertido”.

A obra está protagonizada por Xurxo Barcala, Toño Casais, Marta Lado, María Ordóñez, Diego Rey, Marta Río, Artur Trillo e Dani Trillo.

Os protagonistas da historia Eduardo Rocancourt e o seu socio, Ferdinand Demara, son acusados de tráfico de influencias e evasión fiscal, e desaparecen. A súa muller, Anna Rocancourt, afirma descoñecer tanto o paradoiro do seu marido como o alcance da súa actividade económica. A noticia coñeceuse xusto despois de que a empresa Rocancourt recibira o proxecto de construción do novo hospital comarcal, licitado en 300 millóns de euros. O alcalde, Arthur Furguson, decidiu entregar o contrato de construción á empresa local Ponzi. A historia de Rocancourt ten en vilo a todo o país. O nome que simbolizaba o prestixio patrio pasou a converterse na vergoña nacional. Prolóngase así un xogo de mentiras e medias verdades, de encubrimentos e “amiguismos” ao servizo de intereses políticos e empresariais.

As entradas están á venda en www.culturatui.info ata o venres 1 de febreiro ás 12h, e o propio venres 1 de febreiro dende as 20h no despacho de billetes. Os prezos son 6€ e 5€.

Talía Teatro con “O servidor de dous amos”

  • Lugar: Teatro Municipal de Tui
  • Data: Venres, 1 de febreiro, ás 21.30h
  • Entradas á venda: en www.culturatui.info ata o venres ás 12h ou o venres dende ás 20h no despacho de billetes
  • Prezos: 6€  e 5€