Unha videoconferencia facilita a ‘viaxe’ á Antártida do alumnado de Ciencias do Mar

Coñeceron de preto como é a vida nunha campaña e como se fai investigación de referencia
Publicado por o día 11/04/2019 na sección de Galicia,Universidade de Vigo,Vigo

Unha videoconferencia facilita a ‘viaxe’ á Antártida do alumnado de Ciencias do Mar

O alumnado da Facultade de Ciencias do Mar viviu este xoves unha particular ‘viaxe’ á Antártida e fíxoo a través dunha conexión en directo co persoal investigador que traballa a bordo do buque Joides Resolution, un barco de perforación que está a participar na campaña IODP (Integrated Ocean Drilling Program), un dos programas científicos máis ambiciosos da historia e co que se busca, entre outros obxectivos, cumprir o soño de atravesar a codia terrestre e chegar por primeira vez cunha perforación ata o manto. Trátase de estudar a historia do planeta, entender os diferentes mecanismos que producen os terremotos ou, simplemente, explorar os límites da vida.

Para achegarlles todos os detalles de como é a vida nunha campaña oceanográfica, como se fan as cousas neste barco e como se fai a ciencia de referencia a nivel mundial contaron coa testemuña de dúas das investigadoras españolas involucradas neste proxecto e que teñen ás súas costas unha longa traxectoria de colaboración coa Universidade de Vigo: Lara F. Pérez, egresada da propia Facultade de Ciencias do Mar e investigadora no British Antartic Survey, unha institución nacional do Reino Unido dedicada á investigación na Antártida; e Marga García, científica do Instituto Andaluz de Ciencias de la Tierra IACT-CSIC e colaboradora habitual do grupo de investigación en Oceanografía Xeolóxica e Bioxeoquíma (XM-1) da Universidade de Vigo.

“O que máis chama a atención deste barco é a súa inmensa torre de perforación”

Presentadas polo investigador Anxo Mena, do grupo XM-1, ambas investigadoras afondaron en como é a vida a bordo e nas principais curiosidades e hábitos que trae consigo este tipo de traballo, sobre todo, cando se leva a cabo nun lugar tan privilexiado como é a Antártida. “Cando fas un percorrido polo exterior do barco é habitual ver baleas e pingüíns”, salientou García e, de feito, apenas un par de minutos despois, mentres as investigadoras facían un percorrido pola cuberta, os propios asistentes á charla-  que se levou a cabo no salón de actos do Edificio de Ciencias Experimentais- puideron ver en directo o salto dunha desas baleas. “Estas son as lanchas de salvamento, caben 71 persoas en cada unha”, explicou Pérez, ao que engadiu que nesta campaña traballan a bordo do buque 121 persoas.

“O que máis chama a atención deste barco é a súa inmensa torre de perforación, que se nas imaxes impresiona, asegúrovos que en directo faino moito máis”, explicou García. Tras pasar pola ponte de mando, visitaron tamén o laboratorio no que ambas traballan e amosáronlle aos alumnos e alumnas como é o seu traballo alí: como se realiza a extracción de testemuñas, como se cortan, o tipo de traballo que se leva a cabo despois…

O que se esconde no fondo do mar…

Hoxe en día a campaña IODP, da que forman parte ambas investigadoras, está liderada por Estados Unidos, Xapón e un consorcio europeo e canadense composto por 18 países, entre os que se atopan Portugal e España. As súas grandes liñas de traballo seguen sendo as mesmas ca cando se puxo en marcha, no ano 2003, e consisten, sobre todo, na recuperación de testemuñas de sedimento que axudan a comprender como era o clima no pasado; perforar as profundidades da codia terrestre para coñecer a dinámica da litosfera e o estudo da biosfera máis fonda, na que poderían atoparse algúns dos segredos da orixe da vida.