Medio Rural convoca preto dun millón de euros en axudas para indemnizacións por sacrificio obrigatorio de animais

O prazo de presentación de solicitudes arranca mañá e prolongarase ata o 30 de novembro
Publicado por o día 28/01/2020 na sección de Agricultura e Gandería,Xunta de Galicia

Medio Rural convoca preto dun millón de euros en axudas para indemnizacións por sacrificio obrigatorio de animais

O Diario Oficial de Galicia (DOG) publica hoxe cun orzamento próximo ao millón de euros unha nova orde de axudas da Consellería do Medio Rural para indemnizar o sacrificio obrigatorio ou morte de animais en execución de programas e actuacións oficiais de vixilancia, loita, control e erradicación de enfermidades. A convocatoria deste ano 2020 está dotada, en concreto, dun presuposto de 935.244 euros.

Poderán beneficiarse destas achegas os titulares con gando vacún, ovino ou cabrún que morra ou deba sacrificarse por padecer ou convivir con reses afectadas pola tuberculose, brucelose, leucose ou lingua azul. Tamén os que teñan animais sacrificados, mortos ou destruídos por encefalopatías esponxiformes transmisibles e aves sacrificadas dentro dos programas nacionais de control de salmonela, por un foco de influenza aviaria ou por enfermidade de Newcastle. A maiores, poderá indemnizarse a morte ou sacrificio de animais como consecuencia dunha resolución ou de actuacións sanitarias oficiais impostas pola autoridade competente, así como por tratamentos e manipulacións preventivas ou con fins de diagnóstico.

Para ter dereito a estas axudas é imprescindible que a explotación estea correctamente inscrita no Rexistro Xeral de Explotacións Gandeiras (REGA) e cumprir a normativa en vigor sobre sanidade e identificación animal, movemento pecuario, benestar e alimentación animal. Tamén será de obrigado cumprimento estar ao día dos programas nacionais de vixilancia, loita, control e erradicación de enfermidades dos animais e que sexa efectivo o sacrificio obrigatorio ordenado pola Consellería do Medio Rural.

O prazo de presentación das solicitudes prolongarase dende mañá, día seguinte ao da publicación da orde no DOG, ata o 30 de novembro de 2020. Os órganos xestores tramitarán, ademais das indemnizacións correspondentes ao ano 2020, todas as solicitudes que quedasen pendentes do exercicio anterior.