Segundo a Dirección Xeral de Tráfico, o exceso de velocidade e o consumo de alcol son os responsables de máis da metade dos accidentes mortais de tráfico. Ademais, as distraccións ao volante (especialmente polo uso do móbil) e non utilizar o cinto de seguridade, son outras das condutas que adoitan estar directamente implicadas na maior parte dos sinistros na estrada.

A pesar destes datos, a Organización de Consumidores e Usuarios (OCU) comprobou a través dunha enquisa realizada a 1.125 condutores de entre 25 e 79 anos, que aínda son demasiados os que non son conscientes dos perigos asociados a unha condución imprudente.

Segundo esta enquisa, o 52% de condutores admite que supera o 110 km/h en estradas secundarias (onde a velocidade máxima permitida é de 90 Km/h), un 43% deles recoñece que conduciu habendo bebido algo de alcol (un 6% fíxoo habendo bebido bastante); outro 12% sinala que non se pon o cinto en traxectos curtos e un de cada catro indica que usa o móbil ao volante, xa sexa para realizar ou responder unha chamada (24%), escribir ou ler un wasap ou manipular o navegador instalado no teléfono (17%).

Con todo, a enquisa de OCU tamén revela que non todos os condutores compórtanse da mesma forma: mentres que o 49% dos homes de entre 25 e 39 anos enquisados foron multados no último ano, apenas o foron o 19% das mulleres da mesma idade. Ademais, entre os maiores de 60 anos, a sinistralidade é igualmente alta.

A multa máis frecuente, por exceso de velocidade

Entre os condutores enquisados, a multa máis frecuente durante o últimos cinco anos foi por exceso de velocidade, sancionada con 132 euros de media, seguida polas sancións por mal aparcamento. Tras estas, aínda que con moita menos frecuencia, as impostas por entrar nalgunha zona urbana restrinxida para residentes e as orixinadas por saltarse un semáforo.

OCU considera rechamante que as sancións relacionadas coa inxesta de alcol e o uso do móbil durante a condución apenas suman o 2% do total de multas impostas, así como que o número de sancións en estradas secundarias representen tan só o 26%, cando entre ambas suman o 55% dos falecidos en accidente de tráfico.

A Organización de Consumidores cre que estes datos revelan unha preocupante falta de control en estradas convencionais e sobre condutas especialmente perigosas, como a inxesta de alcol ou o uso do móbil. Mesmo, a metade dos enquisados opina que deberían aumentarse as accións de control sobre os condutores.

Neste sentido, OCU non cre que a solución pase por aumentar o importe económico das sancións, senón por facelo coas consecuencias dunha mala condución: por exemplo, aumentando a perda de puntos.

Afán recadatorio dos concellos

As multas debido á restrición do tráfico no centro da cidade e as limitacións para aparcar aumentaron de maneira considerable nos últimos anos. De feito, aquelas multas municipais, entre as que destacan as de aparcamento en zonas restrinxidas a residentes, supoñen xa máis da metade das que reciben os condutores, que residen na Comunidad de Madrid, a Comunidade Valenciana ou Cataluña.

Para OCU, o aumento neste tipo de sancións, cuxa influencia sobre a seguridade viaria é moi escasa, fai pensar nun fin recadatorio por parte dos Concellos. Máis aínda desde a introdución da fórmula de reducir ata o 50% o importe por pronto pago, que desincentiva ao condutor para iniciar calquera acción legal incluso cando considera que a sanción é inxusta. De feito, segundo a enquisa de OCU, só o 8% das multas foron recorridas e entre estas só no 37% dos casos déuselle a razón ao condutor.

Peticións de OCU

OCU cre que é necesario introducir cambios que disuadan as condutas temerarias ao volante, aínda demasiado numerosas segundo desvélase dos resultados da súa enquisa. Por iso, a Organización de Consumidores pide:

• Aumentar as medidas de control nas estradas convencionais, xa que é alí onde se contabiliza un maior número de falecidos. É dicir, máis presenza policial e máis radares nas zonas de alta sinistralidade. Así como incidir na mellora do firme.
• Equiparar a retirada de puntos entre as condutas máis temerarias. Isto é, que o uso do móbil ao volante supoña a retirada de 6 puntos do carné, tal e como sucede coas sancións por alcoholemia ou exceso de velocidade.
• Contar con recursos para incrementar as campañas de educación neste ámbito.