O Museo do Mar de Galicia acolle a presentación da nova edición do certame para a mocidade ‘Lingua de Namorar’

Contou coa asistencia do secretario xeral de Política Lingüística, Valentín García, e da directora xeral de Xuventude, Participación e Voluntariado, Cristina Pichel
Publicado por o día 14/02/2020 na sección de Cultura,Galicia,Vigo,Xunta de Galicia

O Museo do Mar de Galicia acolle a presentación da nova edición do certame para a mocidade ‘Lingua de Namorar’

O Museo do Mar de Galicia acolleu hoxe a presentación da nova edición de Lingua de Namorar, o certame de declaracións de amor na rede que promove cada San Valentín a Xunta de Galicia, como unha iniciativa para dinamizar o uso do galego entre a mocidade nas súas relacións persoais e en internet. Ao acto asistiron o secretario xeral de Política Lingüística, Valentín García, e a directora xeral de Xuventude, Participación e Voluntariado, Cristina Pichel.

“A lingua galega ten que darse cita coa mocidade nas datas máis sinaladas, como é sen dúbida este Día dos Namorados, unha xornada propicia para expresar e comunicar os afectos aos que sempre queremos ligar o noso idioma propio”, sinalou Valentín García.

Pola súa banda, a directora xeral de Xuventude, Participación e Voluntariado, Cristina Pichel, lembrou que este é un concurso que gusta moito entre a xuventude e que, ademais este ano, busca xerar sinerxías. Neste sentido, destacou que os primeiros premios do certame Xuventude Crea 2019 nas categorías de Poesía e Relato Breve incorporaranse ao xurado, “o que axudará a seguir visibilizando a creatividade e o talento dos mozos e mozas galegos”, remarcou.

O certame Lingua de Namorar está dirixido a mozos e mozas de 14 a 35 anos, que se dividirán en dúas categorías de idade: de 14 a 19 anos e de 20 a 35. As mensaxes presentadas a concurso deberán estar escritas en lingua galega e poderanse redactar en prosa ou en verso. A súa extensión máxima será de 350 caracteres, incluídos os espazos en branco. Cada participante poderá enviar un máximo de dúas mensaxes ao concurso.

Para facer chegar as mensaxes, cómpre rexistrarse previamente no web do certame: http://xuventude.xunta.es/linguadenamorar. Todas as mensaxes serán publicadas nesta páxina e estarán identificadas polo título e mais polo número que se lles asigne. A data límite para enviar as mensaxes de amor é o 9 de marzo. Unha vez rematado este prazo, abrirase outro para realizar as votacións, que abranguerá do 10 ao 13 de marzo.

Resolución do xurado e premios

O xurado do concurso elixirá as mensaxes gañadoras entre as 50 declaracións máis votadas en cada categoría. A súa resolución publicarase o 23 de marzo na páxina web do concurso.

Establécense tres premios por cada unha das categorías de idade. A entrega de premios terá lugar en abril.

Comentar noticia

Your email address will not be published.