O Voluntariado de As Neves e A.C As Neves Group desminten aos Populares de As Neves

Por o 13/05/2019 | Sección: As Neves,Galicia,Social
O Voluntariado de As Neves e A.C As Neves Group desminten aos Populares de As Neves
Compartir en:

En relación coa nota de prensa publicada o pasado día 9 de maio,no Faro de Vigo co titular “El PP afirma que As Neves desvía el control de ayudas por los incendios a una asociación“, o grupo do Voluntariado de As Neves e @s integrantes da AC As Neves Group, queren facer as seguintes aclaracións:

 O grupo de Voluntariado de As Neves é un grupo aberto formado por persoas de distintas ideas políticas, idades e formación, creado a raíz dos incendios do 15 de outubro de 2017.

 Este grupo formouse, como todo grupo de voluntari@s, co fin de axudar altruistamente e dunha forma inmediata, aos afectad@ s por estes terribles sucesos, aportando cada quen o que podía e , iso sí, tod@s o seu tempo, roubado a súa familia, o seu ocio ou ao seu descanso, sen recibir nada a cambio, só o agradecemento e afecto das persoas do concello ás que se axudaba e a satisfacción de sentirse útiles.

 A asociación AC As Neves Group, á que se refire a nota sen nomeala expresamente, foi constituida en 2016 coa finalidade de organizar e participar en actividades culturais e lúdicas para @s cativ@s .

 Despois dos incendios que arrasaron o noso concello, moitas foron as persoas que querían axudar con donativos para contribuir a paliar os efectos dos lumes. A canalización desas aportacións fixose abrindo unha conta denominada “As Neves zona cero”, expresamente destinada a xestionalas con axilidade e garantías, establecéndose un protocolo de funcionamento desta conta solidaria, entre o concello e a asociación As Neves Group.

 Absolutamente todos os pagos realizados dende a conta As Neves Zona Cero foron feitos por transferencia bancaria e cumprindo escrupulosamente os mecanismos establecidos no protocolo de funcionamento.

 É mentira que as axudas directas non fosen supervisadas de forma oficial, xa que si o foron polo concelleiro de Servizos Sociais e coa intervención dos Servizos sociais do concello.

 Tamén é mentira que non houbera supervisión dos cartos dos donativos: os datos son públicos e publícanse periodicamente na páxina web do concello. De feito, hai menos dun mes que se publicou un resumo da actividade desta conta.

 As persoas integrantes destes dous grupos queren manifestar o seu malestar pola falta de respecto que supón esta manipulación da información cara ao seu traballo e tamén ás persoas que donaron os seus cartos.

É indignante e repugnante que persoas, que non prestaron ningún tipo de axuda, nin colaboración, tras este terrible suceso, ataquen desta maneira tan miserable a tod@s @s veciñ@s que, traballaron en favor dos demais, desatendendo en moitos casos os seus compromisos privados.

Este grupo de voluntarias e voluntarios foron considerados, en moitos lugares, como un grupo exemplar pola súa eficacia e rapidez de resposta ante unha situación tan dramática como a vivida.
É triste e lamentable que sexa unha parte da nosa veciñanza a que non só non recoñeza ese traballo, senón que nos calumnie aproveitando o momento político que vivimos.

Non se deben mesturar os intereses políticos coa xustiza social. Na política, coma na vida, NON TODO VALE.

Voluntariado As Neves
A.C As Neves Group.

Comentar noticia

Your email address will not be published.