A Deputación de Pontevedra presentará este martes no Teatro Rialto de Madrid (Gran Vía, 54) ás 19.30 horas a nova campaña de promoción turística do destino “Pontevedra Provincia” ante un público integrado por turoperadores, medios de comunicación xeneralistas e especializados, bloggers, instagramers, influencers e público final. O evento, no que se dará cita tamén o sector turístico público e privado da provincia, estará conducido pola presidenta provincial Carmela Silva e o xornalista pontevedrés Xabier Fortes.

Durante o evento darase a coñecer a nova campaña de promoción turística de Pontevedra Provincia que, este ano, chegará, ademais de a Madrid, ata Barcelona, Lisboa, Porto e outros puntos da xeografía nacional e internacional. Este ano a Deputación escolleu como eixo promocional o patrimonio da provincia baixo o lema “Somos historias“. Deste xeito, e co fío condutor da activista e columnista María Vinyals, o patrimonio fortificado, representado por torres e castelos; ata o arqueolóxico, cos xacementos como abandeirados; o paisaxístico, dando a coñecer xardíns e miradoiros; o patrimonio literario, amosando unha provincia inspiradora de escritoras e escritores; o relixioso e espiritual, representado polos mosteiros, cemiterios singulares e a catedral de Tui; o inmaterial, con mitos, lendas e tradicións como embaixadores da provincia; o patrimonio natural, a través das nosas especies senlleiras, aves e espazos naturais; e o patrimonio etnográfico e cultural, representado polos museos, entre outras cuestións, serán os protagonistas da campaña que se presentará no teatro madrileño.

Na presentación do destino, ademais da condución de Xabier Fortes, actuará a cantante e compositora Najla Shami.  Tamén se presentarán audiovisuais, haberá representacións e espazo para a degustación gastronómica dos produtos máis sobranceiros da provincia.

Noticias Vigo

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.