Volta ao cole: os libros de texto soben un 1,6% en 2019

A pesar dos programas de gratuidade de libros de texto que algunhas comunidades están a implantar, o 80% das familias terá que incluír na súa factura pola Volta ao Cole, a compra de libros de texto. O desembolso medio destas familias será de 198€
Publicado por o día 02/09/2019 na sección de Educación,OCU,Social

Volta ao cole: os libros de texto soben un 1,6% en 2019

A Organización de Consumidores e Usuarios realizou o seu estudo sobre o prezo dos libros de texto para o que analizou máis de 4.000 libros de texto, lectura, cadernos de exercicio de diferentes cursos para coñecer a evolución do seu prezo. Este estudo permite tamén comparar os prezos entre os diferentes niveis de ensino, coñecer que editoriais subiron os prezos, así como orientar aos consumidores sobre os establecementos con mellores prezos.

OCU lembra que os libros de texto do ensino obrigatorio (Primaria e ESO) son unha excepción e o seu prezo é libre, polo que a diferenza de prezo entre un establecemento e outro pode ser moi elevada. O resto dos libros teñen unha política de prezo fixos, cuns descontos máximos autorizados do 5% que algúns establecementos online aplican sistematicamente.

Un 1,6% máis caros que en 2018

O estudo de OCU sinala que o prezo medio dos libros de texto subiu un 1,6% respecto a 2018. Trátase dunha subida de prezos moderada se se compara coa do ano anterior (3,4%) pero aínda así é superior á subida do IPC no mesmo período que subiu só un 0,4%. Non todos os libros subiron da mesma forma. Os libros con prezo fixo (dos ensinos non obrigatorios, como bacharelato) subiron un 1,9% fronte aos libros de prezo libre (primaria e secundaria) que subiu un 1,4%. Esta subida supón sobre a factura media en libros de texto un incremento de 3 euros que se eleva a 5 euros para alumnos de Bacharelato.

Do mesmo xeito que ocorre co tipo de prezo, as subidas de prezos varían de maneira significativa en función da editorial. Segundo a análise de OCU, Cruilla (3,8%), Macmillan (3%) e SM (2,5%) son as editoriais que máis soben os seus prezos. Fronte a elas outras, como Cambridge (-4,2%) ou Pearson (-0,5%), son as que menos subiron ou mesmo baixaron de prezo nos establecementos analizados.

OCU apunta que non son só as editoriais as responsables dos prezos, xa que os establecementos tamén poden modificalos cando se trata de libros con prezos non regulados. Así, os datos deste estudo mostran que Casa do Libro e O Corte Inglés foron as dúas tendas que máis elevaron o prezo dos libros de ensino obrigatorio este ano, un 2,2% e un 2,1% respectivamente. Pola contra, Imosver (1,0%) e Carrefour (1,2%) son os establecementos que menos subiron os seus prezos.

Onde se atopan máis baratos?

Para pescudar cales son os establecementos máis baratos para comprar libros de texto este ano, OCU comparou os prezos en cinco establecementos online: Amazon, Carrefour, Casa do Libro, O Corte Inglés e Imosver para coñecer cal ten, de media, mellor nivel de prezos.

Segundo os resultados, nos libros con prezo fixo as diferenzas son pouco significativas. Con todo, os que permiten un prezo libre sofren variacións máis acusadas, chegando a case alcanzar o 10%. En xeral, o mellor nivel de prezos ofréceo Carrefour con valores case idénticos aos de Amazon e Casa do Libro. O Corte Inglés e a plataforma Imosver pola contra, son os máis caros.

Segundo OCU, a diferenza no prezo dos libros de ensino obrigatorio pode supoñer un importe significativo para o consumidor, xa que é posible atopar para libros puntuais diferenzas de prezos moi importantes. Por iso, a Organización de Consumidores recomenda ás familias que non poidan beneficiarse de programas de gratuidade de libros de texto https://www.ocu.org/consumo-familia/compras-online/noticias/libros-texto-curso-escolar, que comparen entre diferentes establecementos xa que o aforro medio alcanza os 40 euros no caso de libros de ESO e Primaria.

A pesar dos incrementos de prezos dos libros de texto que reflicte este estudo, o gasto escolar en libros de texto ten unha tendencia á baixa. En 2013 o conxunto das familias afirmaba que se gastaría 176 euros por alumno fronte aos 159 euros do estudo sobre a Volta ao cole presentado por OCU en 2019. Nesta redución sen dúbida influíu que xa só o 80% dos fogares afirma que durante este curso terá que afrontar a compra de libros, fronte ao 85% en 2013, probablemente polos programas de préstamo e/ou gratuidade de libros de texto.

Ademais, entre quen afirma que si teñen que comprar algún libro, a factura tamén se reduciu sensiblemente, ao situarse en 198€ de media, fronte aos 209 euros de 2013.

Comentar noticia

Your email address will not be published.