Campaña galega pola Obxección Fiscal aos gastos militares 2018

Nos inicios deste mes de abril Facenda lanzou a campaña da renda 2017. Coincidindo coa apertura da data para presentar a declaración da renda, varios colectivos do estado propoñemos a campaña pola Obxección Fiscal 2018.
Por o 11/04/2018 | Sección: Galicia,Social
Campaña galega pola Obxección Fiscal aos gastos militares 2018
Espazo Aberto Antimilitar > http://nonaogastomilitar.org
Nos inicios deste mes de abril Facenda lanzou a campaña da renda 2017. Coincidindo coa apertura da data para presentar a declaración da renda, varios colectivos do estado propoñemos a campaña pola Obxección Fiscal 2018.
Lembrade que se queredes facer Obxección Fiscal non confirmar o borrador da declaración da renda. Xuntamos información sobre como facer a Obxección Fiscal (a achega que propoñemos nós é de 80€ a detraer do que se destinaría a Gasto MIlitar nos Orzamentos Xerais) > http://www.grupotortuga.com/Campana-de-Objecion-Fiscal-al,305
Achegamos a continuación o texto que lanzamos este ano que vai estruturado por temas:
Exército 0.0
O proceso cara á conquista da independencia e a proclamación da República Catalá axudou a lembrarnos, grazas en gran medida ás sinceras declaracións da ministra de defensa, cal é o verdadeiro papel das Forzas Armadas; o de defender a “unidade territorial” de España.
O artigo 8 do Título Preliminar da Constitución de 1978, onde se recolle esta función, outórgalles tamén a misión de garantir a soberanía e independencia de España. Porén, non tivemos noticia da súa participación para evitar, por exemplo, a modificación do artigo 135 da Constitución, que supuña o compromiso, por escrito, da perda absoluta de soberanía en favor da Unión Europea. Nin do seu despregamento para garantir a defensa das institucións cando foron intervidas polos “homes de negro” da troika.
Pero quizais é unha boa noticia que, despois de anos de propaganda para conseguir o lavado de cara das FFAA, logo da súa profesionalización no 2001 (dende ese ano ata o 2010, o gasto en publicidade era de 10-20 millóns de euros anuais), o rei quedase por fin espido. Nin a guerra é paz, nin a liberdade escravitude.
Incremento no gasto militar
O Centre Delàs denunciou que, por primeira vez en 10 anos, o gasto militar aumentou nun 32% respecto ao 2016 (incluíndo o pagamento dos PEAS, Programas Especiais de Armamento, que o goberno non ten en conta para camuflar o gasto, e sufraga despois mediante créditos extraordinarios).
Pero o máis grave é que nos próximos 6 anos preténdese incrementar o gasto en defensa entre o 50% ou 80%, para achegarse á meta do 2% do PIB en 2024, establecida no cumio de Gales da OTAN e esixida por EEUU.
Onde se despregaron as tropas no 2017?
Ademais de nas rúas de Tarragona días antes das eleccións do 21D, o exército español participou nas seguintes misións (fonte: Utopía Contagiosa):
– Envío á fronteira Letonia-Rusia de 313 militares e 80 vehículos. Non aprobada polo Congreso. De acordo co exministro Margallo, para garantir a posición de Letonia, favorable a priori á independencia de Catalunya, a favor da defensa da unidade de España.
– 5 misións baixo mando da OTAN: adestramento de soldados en Iraq, apoio con mísiles Patriot a Turquía, grupos navais permanentes da OTAN, policía aérea no Báltico, Sea guardian e loita contra a insurxencia e reconstrución en Afganistán.
– 6 baixo mando da UE: en República Centroafricana e Somalia adestrando militares, apoio ao expansionismo francés en Malí e operacións Atlanta no Índico e Destacamento Marfil en Senegal.
– 3 baixo o mando da ONU: patrullas no Líbano, fronteira con Israel (635 efectivos, a máis numerosa), vixilancia de desarme en Colombia, apoio aéreo á RCA en Gabón.
– 4 por iniciativa propia: Golfo de Guinea (incremento da seguridade), apoio e adestramento ás FFAA de Mauritania, Senegal e Túnez.
Militarización da sociedade
Considérase que a aprobación do real decreto 194/2010 de 26 de febreiro, en que se elevou a rango de “autoridade civil” aos militares, abriu a porta á militarización da sociedade. Porén, a creación da UME (Unidade Militar de Emerxencias) xa supuxo un importante fito no despregamento do exército dentro do propio territorio fóra de épocas de guerra. O obxectivo era múltiple. Por unha banda, asegurarse o control da poboación no momento que se produce unha situación de crise que, potencialmente, podería levar a un levantamento contra o goberno e, posteriormente, poder controlar calquera investigación sobre as causas. Por outra, controlar un sector cada vez máis precarizado onde traballadores/as que se xogan a vida comezaban a esixir melloras. E, ao tempo, reforzar a falsa imaxe de exército “salvador” que se pretende crear, aínda que en Galiza, coñecendo súa actuación durante a loita contra o chapapote do Prestige, resultaría máis difícil de crer. Profundando nesta liña, o 1 de febreiro de 2017, aprobouse a creación a Escola Militar de Emerxencias, tanto para persoal militar como civil.
Pero isto non é todo na estratexia de “normalizar” a presenza do exército na sociedade. Xunto corpos armados, entran nas escolas a recrutar á poboación estudante, están presentes en salóns do ensino (con campañas en contra como Desmilitaritzem l’Educació), realizan exhibicións aéreas, como se a guerra fose un espectáculo, faise chegar incluso aos reis magos en helicópteros militares, ou realízase anualmente un concurso escolar para loar a figura do mando supremos das forzas armadas (FFAA).
Por se isto fose pouco, en decembro de 2015 asinouse un acordo (válido por 5 anos) entre os ministerios de educación e defensa, para elaborar materiais educativos e implantalos nas escolas, co obxectivo, segundo o daquela ministro Morenés, de concienciar ao alumnado de primaria e ESO sobre a “cultura da defensa”. O contido principal estaría centrado, segundo se publicou na prensa, en dar a coñecer as FFAA como fornecedoras dun servizo público esencial: “a paz”. Tamén se trataría o papel da coroa como “símbolo da unidade e permanencia do Estado” e buscaríase que o alumnado se familiarice cos “símbolos nacionais”: escudo, bandeira e himno, así como co “deber de defender España. Todo isto a maiores dos contidos xa presentes na materia de “educación para a cidadanía” da LOMCE (eldiario.es, 07/02/2018). Pero, semella, que isto non se pode considerar “adoutrinamento”.
Quizais deberiamos prestar máis atención a estes avances do militarismo na nosa sociedade, que nos achega ao modelo doutras ás que, posiblemente, non queiramos semellarnos.

Noticias de última hora en Vigo

Comentar noticia

Your email address will not be published.