O programa da Deputación “Violencia zero” enche a praza do Concello do Porriño coa actuación da actriz Mónica Camaño

Ao redor dun centenar de rapazas e rapaces dos centros José Fernández López e Hermanos Quiroga Rodríguez participaron na acción escénica “Proxecto Aurora”
Publicado por o día 21/09/2018 na sección de Deputación de Pontevedra,Galicia,O Porriño

O programa da Deputación “Violencia zero” enche a praza do Concello do Porriño coa actuación da actriz Mónica Camaño

A deputada de Cohesión Social e xuventude, Digna Rivas, e a alcaldesa do Porriño, Eva García de la Torre, asistiron hoxe á vixésimo primeira intervención artística do programa “Mulleres en acción. Violencia zero” na praza do Concello, unha iniciativa que ten por obxectivo darlle visibilidade á loita contra as violencias machistas, así como dar a coñecer o traballo de novas artistas contemporáneas que están a traballar a prol da igualdade.

A protagonista do acto foi a actriz Mónica Camaño que a través da súa obra Proxecto Aurora fixo un chamamento alto e claro ao fin das violencias machistas. Ao redor dun centenar de rapazas e rapaces dos centros educativos José Fernández López e Hermanos Quiroga, xunto a un grupo numeroso de veciñas e veciños da vila, presenciaron a acción escénica na que Camaño denunciou, mediante frases populares como “a muller e a sartén na cociña están ben”, as actitudes patriarcais e o machismo ao que están sometidas as mulleres.

Neste senso, Rivas quixo lembrar a importancia que teñen as accións do programa “Violencia zero” da institución provincial para “darlle visibilidade ás mulleres”. Ademais, a deputada provincial dirixiuse ao alumnado destacando que “todas e todos vós sodes a clave para rematar coa lacra dos asasinatos por violencia de xénero”. Tamén aproveitou Rivas para destacar a labor do Goberno de Carmela Silva ao ter creado unha área de igualdade que loita para acadar o fin da desigualdade e das violencias machistas.

Pola súa banda, a alcaldesa do Porriño resaltou que “a discriminación e a violencia contra as mulleres non vai cambiar se a mentalidade dos mozos non cambia, e isto é preciso facelo desde abaixo”. García de la Torre tamén incidiu en que “aínda que queda moito traballo por facer, temos que desterrar os micromachismos e os macromachismos que conducen á violencia”, “é necesario plantarse e dicir non, as mulleres temos dereito a decidir ter unha parella e acabar cando queiramos, sen que iso implique xogarnos a vida, homes e mulleres somos iguais en dereitos”, reivindicou a alcaldesa.

“Mulleres en acción. Violencia zero” reúne o traballo de 25 artistas especializadas en diferentes modalidades como son a pintura, a música, a danza, o teatro, a poesía, o graffiti ou a performance, vinculadas todas elas pola vontade de ofrecer na súa obra un firme discurso en favor da igualdade de xénero. Esta terceira edición comezou en novembro de 2017 e novamente terá lugar este ano en 25 concellos da provincia (Vigo, Pontevedra, Cerdedo-Cotobade, Mos, A Lama, Forcarei, As Neves, Lalín, Cambados, Ponteareas, Barro, A Cañiza, Valga, Silleda, Catoira, Gondomar, A Guarda, A Illa de Arousa, Bueu, Moaña, O Porriño, Ribadumia, Vilagarcía de Arousa, Mondariz e O Rosal).