Últimos días de inscrición para vivir a experiencia do Marisqueo nas Rías Baixas coas rutas gratuítas da Deputación

O prazo de inscrición para esta actividade de turismo sustentable, na que coñecerán de primeira man o oficio do marisqueo a pé, rematará o próximo xoves
Por o 10/04/2018 | Sección: Deputación de Pontevedra,Eventos
Últimos días de inscrición para vivir a experiencia do Marisqueo nas Rías Baixas coas rutas gratuítas da Deputación
Compartir en:

Esta próxima fin de semana terán lugar as dúas primeiras das catro novidosas rutas gratuítas para descubrir o “Marisqueo nas Rías Baixas” organizadas pola Deputación de Pontevedra. Para estas actividades, que terán lugar o sábado e o domingo en Carril (Vilagarcía de Arousa),  as inscricións están abertas ata o vindeiro xoves 12 de abril, tendo unha limitación de 25 prazas por ruta.

Ditas rutas están deseñadas para achegar a experiencia do marisqueo a pé á poboación da provincia, ofréndolles unha actividade na que poderán levar a cabo un obradoiro práctico de marisqueo nas augas da ría, co apoio das mariscadoras de AmarCarril, e na que recibirán formación sobre este oficio e a súa historia.

Tanto o sábado como o domingo, o punto de encontro para o inicio das rutas será o miradoiro Alto da Rosa (PO-548) 102 do Carril, en Vilagarcía de Arousa. As persoas que teñan confirmada a súa asistencia á actividade deberán traer unicamente calzado axeitado para a parte do obradoiro que se desenvolva na auga (o resto do material será facilitado pola organización).

Con esta experiencia búscase transmitir a historia do marisqueo galego ás novas xeracións e inculcar na sociedade un crecente respecto e consideración pola profesión, como garantía para concienciar sobre os problemas que afectan o marisqueo a pé en Galicia: a consideración social, a substitución xeracional, o furtivismo e a contaminación. Estas rutas “Marisqueo nas Rías Baixas” combinan a vertente turística coa ambiental, sensibilizando deste xeito á poboación local sobre a conservación e posta en valor dos nosos activos turísticos e das nosas rías como un recurso cun enorme potencial, que debe ser optimizado de xeito sustentable.

Tras este fin de semana, as dúas últimas citas terán lugar o sábado 28 e o domingo 29 de abril e para estas dúas rutas as inscricións abriranse luns 16 de abril.